ރާއްޖޭގެ އެންމެ އުތުރަށް ކީމޯގެ ޚިދުމަތް، ރައްޔިތުންނަށް ބޮޑު ލުޔެއް

ކެންސަރު ބައްޔަށް ދޭ ޚާއްސަ ފަރުވާއެއްކަމަށްވާ، ކީމޯ ތެރަޕީ ޚިދުމަތް ކުޅުދުއްފުށީ ރީޖަނަލް ހޮސްޕިޓަލްގައި ފަށައިފިއެވެ.

ކުޅުދުއްފުށީ ރީޖަނަލް ހޮސްޕިޓަލަކީ އުތުރުގެ ރައްޔިތުން ސިއްޙީ ޚިދުމަތަށް ބަރޯސާވާ މައި ހޮސްޕިޓަލެވެ. ހއ، ހދ، އަދި ށ އަތޮޅުގައި 70000 އަށްވުރެ ބޮޑު އާބާދީއެއް ދިރިއުޅެމުން އާދެއެވެ.

ކުޅުދުއްފުށީ ރީޖަނަލް ހޮސްޕިޓަލުން ވިދާޅުވީ ކީމޯ ތެރަޕީގެ ޚިދުމަތް އެ ހޮސްޕިޓަލްގައި ފަށާފައިވަނީ މިދިޔަ ހޯމަދުވަހު ކަަމަށެވެ.

ރާއްޖޭގައި އިތުރުވަމުން އަންނަ ކެންސަރު ބަލި ތަޙައްމަލުކުރާ ގިނަ ބަޔަކު އަތޮޅުތަކުގައިވެސް ދިރިއުޅެމުންއާދެއެވެ. މި ބައްޔަށްދޭ ފަރުވާގެ ޚިދުމަތް މިވަގުތު ލިބެނީ ރާއްޖޭގެ މަދު ހޮސްޕިޓަލަކުންނެވެ. މާލެއިން އުތުރުގައި މި ޚިދުމަޔް ލިބެނީ ހަމައެކަނި ޅ.އަތޮޅު ހޮސްޕިޓަލުންނެވެ. އެހެންކަމުން ޚިދުމަތް ހޯދުމަށް ގިނަ ބަޔަކު ބަރޯސާވަނީ މާލެއަށެވެ. މީގެތެރޭގައި ކޮންމެ 3 ހަފްތާއަކުން މި ޚިދުމަތަށް މާލެ ދަތުރުކުރަންޖެހެއެވެ.

ކުޅުދުއްފުށީ ރީޖަނަލް ހޮސްޕިޓަލްގައި ކީމޯގެ ޚިދުމަތް ދޭން ފެއްޓެވުމާއެކު، ރާއްޖޭގެ އެންމެ އުތުރުގެ އަތޮޅުގެ ރައްޔިތުންނަށް ފަސޭހައިން މި ޚިދުމަތް ލިބޭނެ އިންތިޒާމް މިވަނީ ސަރުކާރުން ހަމަޖައްސަވާފައެވެ.

ކުޅުދުއްފުށީ ރީޖަނަލް ހޮސްޕިޓަލުން ވިދާޅުވީ، ޚިދުމަތަށް އެދުމަތުގެ ފުރުސަތު ހުޅުވާލުމާއެކު އެ ހޮސްޕިޓަލުން ޚިދުމަތް ހޯދުމަށް ޕޭޝަންޓުން ރެޖިސްޓްރީކުރަން ފަށާފައިވާކަމަށެވެ. އެގޮތުން އެންމެ ފުރަތަމަ ޕޭޝަންޓަށް މިދިޔަ ހޯމަ ދުވަހު، ކުޅުދުއްފުށީ ރީޖަނަލް ހޮސްޕިޓަލުން ކާމިޔާބުކަމާއެކު ކީމޯ ތެރަޕީގެ ޚިދުމަތް ދީފައިވާކަމަށެވެ. ކުޅުދުއްފުށީ ހޮސްޕިޓަލުން މި ޚިދުމަތް ފުރަތަމަ ހޯދާފައިވަނީ ހދ.އަތޮޅުގެ އެހެން ރަށެއްގެ ރައްޔިތެކެވެ.
ހޮސްޕިޓަލްގައި އެއްފަހަރާ ދެ ޕޭޝަންޓުންނަށް ކީމޯގެ ޚިދުމަތް ދެވޭނެ ކެޕޭސިޓީ ވަނީ ޤާއިމުކޮށްފައެވެ.

ޚިދުމަތް ފައްޓަވާފައިވަނީ ހުޅުމާލެ ހޮސްޕިޓަލްގެ ނަރުހުންގެ ޓީމުގެ އެހީތެރިކަމާއެކުކަމަށް އެ ހޮސްޕިޓަލުން ވިދާޅުވެއެވެ. އަދި އެ ހޮސްޕިޓަލްގެ އެހީތެރިކަމާއެކު، ކޭ.އާރް.އެޗްގެ ނަރުހުންނަށް އެކަމުގެ ފުރިހަމަ ތަމްރީންވެސް ވަނީ ދެއްވާފައެވެ. އަދި އިތުރު ތަމްރީނާ ތަޖުރިބާ ދިނުމަށްވެސް ވަނީބހަމަޖެހިފައެވެ.

ކުޅުދުއްފުށީ ހޮސްޕިޓަލުން ވަނީ ޚިދުމަތް ހޯދުމުގައި ރައްޔިތުންނަށް ލުއިފަސޭހަ އިންތިޒާމްތައް ހަމަޖައްސައިދެއްވާފައެވެ. ބޮޑުތިލަދުންމަތީގެ 3 އަތޮޅަކީ މިހާރު ސަރުކާރުން ފަށާފައިވާ ރާއްޖެ ޓްރާންސްޕޯޓް ލިންކް އާރްޓީއެލްގެ ދަތުރުތައް ކުރަމުންދާ ސަރަޙައްދެކެވެ. އެ އަތޮޅުތަކުގެ ކޮންމެ ރަށަކުން، ކޮންމެ ދުވަހަކުވެސް ކުޅުދުއްފުއްޓަށް ދަތުރުތައް ބާއްވައެވެ. އެހެންކަމުން މި ޚިދުމަތް ހޯދުމުގައި އާއްމުންނަށް އެން ލުއިފަސޭހަ، ޚަރަދުގެ ގޮތުންވެސް ލުއިގޮތަކަށް ވަނީ އިންތިޒާމްތައް ހަމަޖައްސާފައެވެ.

ކޭ.އާރް.އެޗްއިން ވިދާޅުވީ ޕޭޝަންޓުންނަށް ތެރަޕީ ގަޑިތައް ހަމަޖެއްސުމުގައި، ފެރީ ދަތުރުގެ ގަޑިތަކާއި ދިމާވާގޮތަށް ޕޭޝަންޓަށް އެންމެ ފަސޭހަވާނެހެން އެޕޮއިންޓްމަންޓްތައް ހަމަޖައްސައިދެމުންދާކަމަށެވެ. މިއީވެސް އަމިއްލައަށް އުޅަނދު ކުއްޔަށް ނަގައިގެން އައުމުގެ ބަދަލުގައި، ވީހާވެސް ޚަރަދުކުޑަކޮށް ޚިދުމަތް ފޯރުކޮށްދިނުމަށް ހަމަޖައްސައިދޭ އިންތިޒާމެކެވެ.

ކުރިން މާލެއަށް ބޮޑު ޚަރަދުކޮށް ކޮންމެ މަހަކު ކުރަންޖެހުނު ދަތުުރުތަކާއި، އުފުލަންޖެހުނު މާލީ ތަކުލީފަށް ބޮޑު ލުޔެއް މިވަނީ ލިބިގެން ގޮސްފައެވެ. މިހާރު ބަލިމީހާ ކުރަންޖެހޭނެ ހަމައެކަނި ޚަރަދަކީ އާރްޓީއެލް ފެރީގެ ޚިދުމަތް ހޯދުމަށް ކުރަންޖެހޭ ޚަރަދު އެކަންނެވެ.

ކީމޯ ތެރަޕީއާއި އެކަމުގެ ހުރިހާ ފަރުވާއެއްވެސް ފޯރުކޮށްދޭނީ އެއްވެސް އަގަކާއި ނުލައެވެ.

މިހާރުވެސް ކީމޯގެ ޚިދުމަތް އަތޮޅުތަކުގެ 3 ހޮސްޕިޓަލެއްގައި ދެމުންއާދެއެވެ. އެއީ އައްޑޫ އިކުއިޓޯރިއަލް ހޮސްޕިޓަލް އަބްދުއްސަމަދު މެމޯރިއަލް ހޮސްޕިޓަލް އަދި ޅ.އަތޮޅު ހޮސްޕިޓަލްގައެވެ.