ޕެނަލްޓީގައި ކުވެއިތު ބަލިކޮށް ސާފް ޗެމްޕިއަންޝިޕް ފުޓްބޯޅަ މުބާރާތުގެ ޗެމްޕިއަންކަން ނުވަވަނަ ފަހަރަށް ސަރަޙައްދުގެ ގަދަބާރު އިންޑިއާއިން ހޯދައިފިއެވެ.
އިންޑިއާގެ ބެންގަލޫރުގައި ކުރިއަށްދިޔަ ސާފް ބަންގަބަންދު ޗެމްޕިއަންޝިޕް 2023 ޗެމްޕިއަންކަން އިންޑިއާއިން ހޯދީ މެޗުގެ ފުރިހަމަ ވަގުތު ހަމަވެގެން އިތުރު ވަގުތުގެ ދެ ހާފުގައިވެސް ނަތީޖާ ނުނެރެވުމުން، ޕެނަލްޓީ ޖަހައިގެން 4-5 ގެ ނަތީޖާއަކުން ކުރި ހޯދައިގެންނެވެ.
މި މެޗުގައި އެންމެ ފުރަތަމަ ލަނޑު ޖަހައި ލީޑު ނެގީ ކުވެއިތުންނެވެ. އެ ޓީމުން މެޗުގައި އުފެއްދި ފުރަތަމަ ހަމަލާއިން މި ލަނޑު ކާމިޔާބުކޮށްދިނީ ޝަބައިބް އަލްހަލްދީއެވެ. އޭނާ މި ލަނޑު ކާމިޔާބުކުރީ ކައުންޓާ އެޓޭކެއްގައި އަރިމަތިން ފަހަތަށް ކުޅުނު އަބްދުﷲ އަލްބްލޫޝީ ނަގައިދިން ހުރަހަކުންނެވެ.
އިންޑިއާއިން މެޗުގެ ނަތިޖާ ހަމަހަމަކުރީ މެޗުގެ 38 ވަނަ މިނެޓުގައެވެ. މި ލަނޑު ޗަންގްޓޭ ކާމިޔާބުކުރީ ސުނިލް ޗެތުރީ، އެ ޓީމުގެ ސަލަހަށް ދިން ޕާހަކުންނެވެ. ދެ ޓީމުންވެސް ގިނަ އަދަދެއްގެ ފައުލް މި މެޗުގައި ކޮށްފައިވާއިރު، އިންޑިއާ އަދި ކުވެއިތުންވެސް ވަނީ މި މެޗުގައި ލަނޑު ޖަހާނެ ގިނަ ފުރުސަތުތަކެއް ތަނަވަސްކޮށްފައެވެ.
މި މެޗުގެ ނަތީޖާ ނެރުމަށް ޕެނަލްޓީ ޖެހިއިރު، މި ޝޫޓްއައުޓުގައި ދެ ޓީމަށްވެސް ވަނީ ފުރަތަމަ ފަސް ޕެނަލްޓީގެ ތެރެއިން އެއް ޕެނަލްޓީ ނާކާމިޔާބުވެފައެވެ. އިންޑިއާގެ ޕެނަލްޓީ އުދަންތަ ސިންގް ދިފާއުކުރިއިރު، ކުވެއިތުގެ މުހައްމަދު އަބްދުﷲ ފޮނުވާލި ބޯޅަ ދިޔައީ ގޯލާ އަމާޒުނުވެއެވެ.
ފަސް ޕެނަލްޓީ ހަމަވެގެން ހަވަނަ ޕެނަލްޓީ އިންޑީއާގެ މަހޭޝް ސިންހް ކާމިޔާބުކުރިއިރު، ކުވެއިތުގެ ކެޕްޓަން ޚާލިދް ހާޖިއާ ޖެހި ޕެނަލްޓީ ގޯލްކީޕަރު ގުރްޕްރީތް ސިންގް ވަނީ ދިފާއުކޮށްފައެވެ.
މި މުބާރާތުގެ އެންމެ މޮޅު ގޯލްކީޕަރަކަށް ބަންގްލަދޭޝްގެ ކީޕަރު އަނީސު ރަހްމާން ހޮވުނުއިރު، އެންމެ ގިނަ ލަނޑި ޖެހި ކުޅުންތެރިޔާ އާއި މުބާރާތުގެ އެންމެ މޮޅު ކުޅުންތެރިއަކަށް ހޮވުނީ އިންޑިއާގެ ކެޕްޓަން ސުނިލް ޗެތުރީއެވެ. އޭނާ ވަނީ މި މުބާރާތުގައި ހަ ލަނޑު ޖަހާފައެވެ. އަދި މުބާރާތުގެ ފެއާޕްލޭ ޓީމަކަށް ހޮވުނީ ނޭޕާލެވެ.
މިއަހަރުގެ މުބާރާތުގައި ސާފް ސަރަޙައްދުގެ ހަ ޤައުމުގެ އިތުރުން ސަރަޙައްދުން ބޭރު ދެ ޤައުމަށް ފުރުސަތު ދީފައިވެއެވެ. އެއީ ފައިނަލުގައި ކުޅުނު ކުވެއިތުގެ އިތުރުން ލުބުނާނެވެ. މިއީ މި މުބާރާތުގެ ތާރީޚުގައިވެސް ސަރަޙައްދުން ބޭރު ދެ ޓީމަކަށް ފުރުސަތު ދިން ފުރަތަމަ ފަހަރެވެ.
އެންމެ ފަހުން ރާއްޖޭގައި 2021 ވަނަ އަހަރު ބޭއްވި މުބާރާތުގެ ޗެމްޕިއަންކަން ވެސް ހޯދީ އިންޑިއާއިންނެވެ. އެ ޓީމު ވަނީ މީގެކުރިން 1993، 1997، 1999، 2005، 2009، 2011، 2015 ގައިވެސް ޗެމްޕިއަންކަން ހޯދާފައެވެ.