ޔޫކްރެއިންގެ އުތުރުގައިވާ ރަށެއް ކަމުގައިވާ ސޫމަށް ދިން ވަރުގަދަ ޑްރޯން ހަމަލަތަކެއްގައި ޢާންމުންގެ ދެ މީހުން މަރުވެ، އިތުރު 19 މީހަކު ޒަޚަމުވެއްޖެއެވެ. ސޫމްގެ އޮފިޝަލުން ވިދާޅުވީ ރަޝިޔާގެ ޑްރޯން ހަމަލަތައް އަމާޒުކޮށްފައި ވަނީ ސަރުކާރު އޮފީސް ޢިމާރާތަކާއި ޢާންމުން ދިރިއުޅޭ ދެ އެޕާޓްމަންޓް ޢިމާރާތަށް ކަމުގައެވެ. އެ ރަށް ހަމަލަދޭން ރަޝިޔާއިން ހަތަރު ޑްރޯން ބޭނުންކޮށްފައިވާ ކަމުގައި ވެސް ސޫމްގެ އޮފިޝަލުން ވިދާޅުވެއެވެ.
މި ހަމަލަތަކާ ގުޅިގެން އެ ޤައުމުގެ ރައީސް ވޮލޮޑޮމީރް ޒެލެންސްކީ ވަނީ އެ ޤައުމަށް ވައިގެ ދިފާޢީ ނިޒާމުތައް ބޭނުންވާ ކަމުގައި ވިދާޅުވެފައެވެ. އަދި، ވައިގެ ހަމަލަތަކުން ދިފާޢުވުމަށް މިހާރު ބޭނުން ކުރަމުންދާ ނިޒާމުތައް އިތުރަށް ހަރުދަނާ ކުރަން ޖެހޭ ކަމުގައި އޭނާ ވިދާޅުވިއެވެ.
"ޔޫކްރެއިންގެ ހުރިހާ ރަށެއް ދިފާޢުކުރެވޭ ވަރަށް ވައިގެ ދިފާޢީ ނިޒާމުތަކެއް ނެތް. ނަމަވެސް، ޔޫކްރެއިންގެ އެކި ކަންކޮޅުތަކުގައި ގާއިމުކޮށްފައިވާ ވައިގެ ދިފާޢީ ނިޒާމުތައް ހަރުދަނާ ކުރަން މަސައްކަތް ކުރާނަން. ކުރިއަށް އޮތް ތަނުގައި ވިލާތުގެ ވައިގެ ދިފާޢީ ނިޒާމުގެ ރައްކާތެރިކަން ޔޫކްރެއިނަށް ވެސް ލިބިގެންދާނެ،" ޒެލެންސްކީ ވިދާޅުވިއެވެ.
ޔޫކްރެއިނުގެ ދެކުނުގައިވާ ޚަރްސަން ސަރަޙައްދަށް ވެސް ރަޝިޔާއިން ވަނީ އާޓިލަރީ ބަޑީގެ ހަމަލަތަކެއް ދީފައެވެ. ޚަރްސަންގެ ސްޓެނިސްލާފް ކިޔާ ރަށަކަށް އަމާޒުކޮށް ދިން ހަމަލަތަކުގައި ތިން މީހަކު ޒަޚަމުވި ކަމުގައި ޚަރްސަންގެ އޮފިޝަލުން ވިދާޅުވެއެވެ. އޭގެ ތެރެއިން ދެ މީހަކަށް ހޮސްޕިޓަލުގައި އެޑްމިޓްކޮށްގެން ފަރުވާދެމުންދާ ކަމުގައި ވެސް އޮފިޝަލުން ވިދާޅުވިއެވެ.
ރަޝިޔާއިން ޔޫކްރެއިންގެ އުތުރަށް ވަރުގަދަ ހަމަލަތަކެއް ދީފައި މި ވަނީ، ރަޝިޔާގެ އިސްތިޢުމާރީ ސިފައިންނާ ދެކޮޅަށް އެ ޤައުމުން ވަރުގަދަ ކައުންޓަރއޮފެންސިވެއް ނުވަތަ ރައްދު ހަމަލާގެ އަސްކަރީ ކެމްޕޭނެއް ފަށާފައިވާ ދަނޑިވަޅެއްގައެވެ. އެ ކެމްޕޭނުގެ ދަށުން ރަޝިޔާ ސިފައިން އަތްގަދަކޮށްފައިވާ ސަރަޙައްދުތަކުގެ ތެރެއިން 37 އަކަ ކިލޯމީޓަރުގެ ސަރަޙައްދެއް މިހާރު މިނިވަން ކޮށްފައިވާ ކަމުގައި ޔޫކްރެއިނުން ބުނެއެވެ.
"ފާއިތުވި ހަފުތާއެއްހާ ދުވަހުގެ ތެރޭގައި ޔޫކްރެއިންގެ ފައުޖުތަކުން ވަނީ ނުވަ އަކަ ކިލޯމީޓަރުގެ ސަރަޙައްދެއް ރަޝިޔާގެ އިސްތިޢުމާރީ ސިފައިންގެ އަތްދަށުން މިނިވަންކޮށްފައި. އެއީ އިރުމަތިން. އެއާއެކު، މިހާތަނަށް މިނިވަން ކުރެވިފައިވާ ސަރަޙައްދުގެ ޖުމްލަ ޢަދަދު ވަނީ 37 އަކަ ކިލޯމީޓަރަށް އަރާފައި،" ޔޫކްރެއިންގެ ދިފާޢީ ވަޒީރުގެ ނައިބު ހަނާ މަލްޔާރު ވިދާޅުވިއެވެ.
ޔޫކްރެއިންގެ ދެކުނުން ވެސް 28 ކިލޯމީޓަރުގެ ސަރަޙައްދެއް މިނިވަން ކުރެވިފައިވާ ކަމުގައި ވެސް މަލްޔާރު ވިދާޅުވިއެވެ. އަދި، އިރުމަތީގައި ބަޚްމުތް ހިފުމަށް ޔޫކްރެއިންގެ ފައުޖުތަކުން ކުރަމުންދާ މަސައްކަތުގައި ކުރިއެރުންތަކެއް ހޯދިފައިވާ ކަމުގައި ވެސް އޭނާ ވިދާޅުވިއެވެ.
ފާއިތުވި ސައުވީސް ގަޑިއިރުގެ ތެރޭގައި ރަޝިޔާއިން ޔޫކްރެއިނަށް 17 ޑްރޯން ހަމަލައެއް ދީފައިވާ ކަމުގައި ޔޫކްރެއިންގެ ވައިގެ ސިފައިން ބުނެއެވެ. އޭގެ ތެރެއިން 13 ޑްރޯނެއް ދިފާޢުކޮށް ވައްޓައިލާފައިވާ ކަމުގައި އެ ޤައުމުގެ އަސްކަރިއްޔާއިން ބުނެއެވެ.
ރަޝިޔާއިން ޔޫކްރެއިނަށް ސިފައިން ފޮނުވައިގެން ހަނގުރާމަ ފަށާފައި ވަނީ 2022 ވަނަ އަހަރުގެ ފެބުރުވަރީ މަހުގެ 24 ވަނަ ދުވަހުއެވެ. މި ހަނގުރާމައިގައި ރަޝިޔާ ސިފައިން ހިންގާފައިވާ ކަމަށް ތުހުމަތުކުރެވޭ ޖަރީމާތައް ތަހުޤީޤުކޮށް، ރަޝިޔާއާ ދެކޮޅަށް ފިޔަވަޅު އެޅުމަށް އިންޓަރނޭޝަނަލް ސެންޓަރ ފޯ ދަ ޕްރޮސެކިޔުޝަން އޮފް ދަ ކްރައިމް އޮފް އެގްރެޝަން އަގެއިންސްޓް ޔޫކްރެއިން (އައި.ސީ.ޕީ.އޭ)ގެ ނަމުގައި ބައިނަލްއަޤުވާމީ އިދާރާއެއް ވަނީ އުފައްދާފައެވެ. އެ އިދާރާގެ އޮފީސް ހުންނަނީ ނެދަލެންޑްސްގެ ދަ ހޭގްގައެވެ.