ސެންޓްރަލް އޭޝިއަން ޒޯނަލް ވޮލީބޯލް އެސޯސިއޭޝަން (ކާވާ) ރައީސް މުހައްމަދު ލަތީފާ ކުޅިވަރާ ބެހޭ ވަޒީރު އަޙްމަދު މަޚްލޫފް ބައްދަލުކުރައްވައިފިއެވެ.
ކުޅިވަރާ ބެހޭ ވުޒާރާގައި ކުރިއަށްދިޔަ މި ބައްދަލުކުރެއްވުމުގައި މަޝްވަރާކުރެއްވީ އެ ޖަމުޢިއްޔާގެ އޮފީހެއް ރާއްޖޭގައި ޤާއިމުކުރުމާ ގުޅޭގޮތުންނެވެ. މި ބައްދަލުކުރެއްވުމަށް ފަހު ކުރެއްވި ޓުވީޓެއްގައި މަޚްލޫފް ވިދާޅުވީ ރާއްޖޭގެ ވޮލީ ތަރައްޤީކޮށް ކުރިއެރުވުމާއި ގުޅޭގޮތުން ދެ ބޭފުޅުން މަޝްވަރާކުރެއްވި ކަމަށެވެ.
"ޕީއެސްއެމް ސްޕޯޓްސް" އާ ވާހަކަދައްކަވަމުން ކާވާގެ ރައީސް ލަތީފް ވިދާޅުވީ މި ބައްދަލުވުމުގައި ވޮލީގެ ތަރައްޤީއަށް ކޮށްދެވެންހުރި ކަންކަމާ ގުޅޭގޮތުން މަޝްވަރާކުރެވިގެން ދިޔަ ކަމަށެވެ. އަދި އެންމެ މުހިންމު ކަމެއްގެ ގޮތުގައި މަޝްވަރާ ކުރެވިގެންދިޔައީ ކާވާގެ ހެޑް އޮފީސް ރާއްޖޭގައި ޤާއިމުކުރުމާ ގުޅޭގޮތުން ކަމަށްވެސް ވިދާޅުވިއެވެ.
ލަތީފް ވިދާޅުވީ ރާއްޖޭގައި ކާވާގެ މައި އޮފީސް ޤާއިމުކުރުމާއެކު ވަރަށް ގިނަ ފުރުސަތުތަކެއް ފަހިވެގެންދާނެ ކަމަށެވެ. އެގޮތުން ވަރަށް ގިނަ ތަމްރީން ޕްރޮގްރާމުތަކެއް ރާއްޖޭގައި ހިންގޭނެ ކަމަށާއި އޭގެ ފައިދާ ވޮލީގައި ހަރަކާތްތެރިވާ ކޯޗުން، ރެފުރީން އަދި ޓެކްނިކަލް އޮފިޝަލުންނަށް ކުރާނެ ކަމަށެވެ. އަދި އޮފީސް ޤާއިމުކުރުމުގެ ސަބަބުން ރާއްޖޭގައި ގިނަ ބަޔަކަށް ވަޒީފާގެ ފުރުސަތު ލިބިގެންދާނެ ކަމަށްވެސް ލަތީފް ވިދާޅުވިއެވެ.
ލަތީފް ވިދާޅުވީ ސަރުކާރާއެކު ކުރުވެނު މަޝްވަރާތައް ވަރަށް ކާމިޔާބުކަމަށާއި އުއްމީދަކީ މިއަހަރު ނިމުމުގެ ކުރިން ދިވެހި ސަރުކާރުގެ އެއްބާރުލުމާއެކު ރާއްޖޭގައި ކާވާގެ އޮފީހެއް ޤާއިމުވެގެން ދިޔުން ކަމަށެވެ. ރާއްޖޭގެ ވޮލީ ކުރިއެރުވުމަށް ކުޅިވަރާ ބެހޭ ވަޒީރު މަޚްލޫފް ކުރައްވާ މަސައްކަތް، ކާވާގެ މެންބަރު 14 ޤައުމުން ބަލައިގަންނަ ކަމަށްވެސް ލަތީފް ވިދާޅުވިއެވެ.
ސެންޓްރަލް އޭޝިއާގެ ޒޯނަލް ވޮލީބޯލް އެސޯސިއޭޝަނަކީ ސައުތު އޭޝިއާ އާއި ސެންޓްރަލް އޭޝިއާގެ 14 ޤައުމަކާއެކު އުފައްދާފައިވާ ޖަމުޢިއްޔާއެކެވެ. އެ ޖަމުޢިއްޔާގެ ރައީސްކަމަށް ލަތީފް އިންތިޚާބުވީ 2020 ވަނަ އަހަރުގެ އޮކްޓޯބަރު މަހުގެ 21 ވަނަ ދުވަހުގައެވެ.