މިހާރު ކުރިއަށްދާ 21 އަހަރުން ދަށުގެ ޔޫރޯ ޗެމްޕިއަންޝިޕުގެ ސެމީ ފައިނަލުން އިންގްލަންޑް ޖާގަ ހޯދައިފިއެވެ.
މުބާރާތުގެ ސެމީފައިނަލުން އިންގްލަންޑް ޖާގަހޯދީ ކްއާޓަރ ފައިނަލްގައި ޕޯޗުގަލް އާއި ބައްދަލުކުރިމެޗް އެއްލަނޑު ސުންލަނޑުން ކާމިޔާބު ކޮށްގެންނެވެ.
ޖޯޖިއާގައި މިހާރު ކުރިއަށްދާ މިމުބާރާތުގެ މިމެޗްގައި ގިނައިރު ބޯޅަ ގެންގުޅެ ގިނަ ހަމަލާ އުފައްދާފައިވަނީ ޕޯޗުގަލްގެ ޓީމުންނެވެ. ނަމަވެސް މިއާއެކުވެސް ޕޯޗުގަލްއަށް އިންގްލަންޑްގެ ޑިފެންސް ފޫއަޅުވާލެވޭގޮތެއްނުވިއެވެ.
މިމެޗްގައި އިންގްލަންޑުން ކާމިޔާކުރި ހަމައެކަނި ލަނޑު މެޗްގެ 34 ވަނަ މިނެޓްގައި މޯގަން ގިބްސް ވައިޓް ތަނަވަސްކޮށްދިން ފުރުސަތެއްގައި ޖަހާދިނީ އެންތަނީ ގޯޑަންއެވެ. މިއީ އޭނާ މިމުބާރާތުގައި ކާމިޔާބުކުރި ދެވަނަ ލަނޑެވެ. މިހާފްގެ ދެވަނަ ހާފްގެ ބޮޑުބައިގާ ބޯޅަ ގިނައިރު ގެންގުޅެފައިވަނީ ޕޯޗުގަލްއިންނެވެ. ނަމަވެސް މިފަހަރުގެ މުބާރާތުގައި އަދި މިހާތަނަށް ބައިކޮޅަށް ލަނދެއް ވަދެފައިނުވާ އިންގްލަންޑްގެ ޑިފެންސް ފޫއަޅުވާލުން ވެގެންދިޔައީ ޕޯޗުގަލްގެ ޓީމަށް އުނދަގޫ ކަމަކަށެވެ. އެޓީމުން ލަނޑެއް ޖެހުމާއި އެންމެ ގާތަށް ދެވިފައިވަނީވެސް ދެވަނަ ހާފްގައި ހެންރީކޭ އަރައުހޯ ފޮނުވާލި ހަމަލާގައެވެ. ނަމަވެސް އެހަމަލާ އަމާޒުވީ އިންގްލަންޑްގެ ގޯލް ދަނޑިއަށެވެ.
މި ކާމިޔާބީއާއެކު އަންނަ ބުދަ ދުވަހު ކުޅުމަށް ހަމަޖެހިފައިވާ ސެމީފައިނަލް މެޗްގައި އިންގްލަންޑް ވާދަކުރާނީ އިސްރާއީލް އާއެވެ. މިއީ 2017 ވަނަ އަހަރަށް ފަހު މިމުބާރާތުގެ ސެމީފައިނަލުން އިންގްލަންޑަށް ޖާގަހޯދުނު ފުރަތަމަ ފަހަރެވެ. އަދި މިއާއެކު 1984 ވަނަ އަހަރަށް ފަހު ފުރަތަމަ ފަހަރަށް މިމުބާރާތުގެ ތަށި އުފުލާލުމަށް އިންގްލަންޑުން ކުރަމުންދާ އުންމީދު އަންނަނީ އެޓީމުން އަދި ދަމަހައްޓަމުންނެވެ.