އިންޑިއާގެ ކޯޗު އީގާ ސްޓިމަކް ފައިނަލް މެޗަށްވެސް ސަސްޕެންޑް ކުރަން ސައުތު އޭޝިއަން ފުޓްބޯލް ފެޑަރޭޝަން (ސާފް) އިން ނިންމައިފިއެވެ.
އިންޑިއާގެ ކޯޗު ފައިނަލް މެޗަށް ވެސް ސަސްޕެންޑް ކުރިއިރު، އޭނާ ވަނީ 500 ޑޮލަރުން ޖޫރިމަނާވެސް ކޮށްފައެވެ.
ސްޓިމަކް ސަސްޕެންޑް ކުރަން ސާފް އިން ނިންމީ އޭނާގެ އަހުލާގީ މައްސަލަތަކުގެ ސަބަބުންނެވެ. މި މުބާރާތުގައި ސްޓިމަކްއަށް ވަނީ ދެ ރަތް ކާޑު ދައްކައިފައެވެ. އެގޮތުން އިންޑިއާ ކުޅުނު ފުރަތަމަ މެޗުގައި އޭނާއަށް ރަތްކާޑު ދެއްކީ ޕާކިސްތާން ކުޅުންތެރިއަކާ އެކު ހަމަނުޖެހުން ހިންގުމުންނެވެ. އަދި ގްރޫޕް ސްޓޭޖުގެ ފަހު މެޗުގައި ކުވައިތާ ދެކޮޅަށް އިންޑިއާ ކުޅުން މެޗުގައި ސްޓިމަކްއަށް ރަތްކާޑު ދެއްކީ ތަކުރާރުކޮށް ރެފްރީންގެ ނިންމުމާ ޝަކުވާކުރުމުންނެވެ.
މި އަމަލުތަކާ ގުޅިގެން ސްޓިމަކް ސަސްޕެންޑް ކުރަން ސާފް އިން ނިންމިއިރު، އިންޑިއާގެ ފުޓުބޯޅަ ފެޑަރޭޝަނުން ވަނީ ސްޓިމަކްގެ މި އަމަލުތަކާއި ގުޅިގެން ނަސޭހަތްތެރިވެފައެވެ.
މީގެ ކުރިން ޓްވިޓާގައި ސްޓިމަކް ވަނީ އޭނާގެ މި އަމަލުތައް ދިފާއުވެސް ކޮށްފައެވެ. އެގޮތުން ސްޓިމަކް ބުނީ ކުޅުންތެރިންނަށް ދަނޑުމަތީގައި އިދިކޮޅު ޓީމުގެ ފަރާތުން ގެއްލުންވާނަމަ ނުވަތަ ކުޅުންތެރިން ހިމާޔަތް ކުރަން ޖެހިއްޖެ ނަމަ އޭނާގެ މިއަމަލުތައް ތަކުރާރުކުރަން ފަރުވާލެއް ނެތް ކަމަށް ބުނެފައެވެ.