އިންޑިއާގެ ބެންގަލޫރުގައި މިހާރު ކުރިއަށްދާ ސާފް ބަންގަބަންދު ޗެމްޕިއަންޝިޕް 2023 ގެ ސެމީ ފައިނަލުގައި ކުވެއިތާ ދެކޮޅަށް ރަނގަޅު ފައިޓެއްދީ، 18 އަހަރުގެ ތެރޭގައި ފުރަތަމަ ފަހަރަށް ފައިނަލް ކުޅުން އެއީ ބަންގްލަދޭޝްގެ އަމާޒު ކަމަށް އެ ޓީމުގެ ކޯޗު ހަވިއޭ ކަބްރޭރާ ބުނެފިއެވެ.
ގްރޫޕް ބީގެ ދެވަނަ ޓީމުގެ ގޮތުގައި ބަންގްލަދޭޝްއިން ސެމީގެ ޖާގަ ކަށަވަރުކުރީ ކުޅުނު ތިން މެޗުގެ ތެރެއިން ދެ މެޗު ކާމިޔާބުކޮށް ހޯދި ހަ ޕޮއިންޓާއެކުގައެވެ. އެއާއެކު މި މިއީ 14 އަހަރުގެ ތެރޭގައި ބަންގްލަދޭޝްއިން ސަރަހައްދީ މުބާރާތުގެ ސެމީ ފައިނަލުން ޖާގަ ހޯދި ފުރަތަމަ ފަހަރެވެ.
ސެމީ ފައިނަލް މެޗުގެ ކުރިން އޮތް ނޫސްވެރިންގެ ބައްދަލުވުމުގައި ވާހަކަ ދައްކަމުން ބަންގްލަދޭޝްގެ ކޯޗު ކަބްރޭރާ ބުނީ ގްރޫޕް ސްޓޭޖުގައި ބޫޓާންއާ ދެކޮޅަށް ކުޅުނު މެޗަށްފަހު މި މެޗަށް ތައްޔާރުވާން އެންމެ ރަނގަޅަށް ވަގުތު ނުލިބޭ ކަމަށެވެ. އެކަމަކު މިއީ ޝަކުވާ ކުރަންވީ ވަގުތު ނޫން ކަމަށާއި، ކުވައިތު މެޗުގައި އެ ޓީމަށް "ސަޕްރައިޒް" އެއް ދޭނެ ކަމަށެވެ.
ކަބްރޭރާ ބުނީ ކުވައިތު މެޗަށް ބަންގްލަދޭޝްއިން ނުކުންނަނީ އެ ޓީމުގެ ކުޅުން އެނގިގެން ކަމަށާއި، މެޗުގައި ކުވައިތު ޓީމާ ދެކޮޅަށް ރަނގަޅު ފައިޓެއް ދެވޭނެ ކަމުގެ ޔަގީންކަން އެބައޮތް ކަމަށެވެ.
ކުވައިތާ ބަންގްލަދޭޝް ބައްދަލުކުރާ ސެމީ ފައިނަލް މެޗު އޮންނާނީ މިއަދު ރާއްޖެ ގަނޑިން 14:30 ގައެވެ.