އިންޑިއާގެ ބެންގަލޫރުގައި މިހާރު ކުރިއަށްދާ ސާފް ބަންގަބަންދު ޗެމްޕިއަންޝިޕް 2023 ގެ ސެމީ ފައިނަލުގައި އިންޑިއާއާ ދެކޮޅަށް ނުކުންނައިރު އެންމެ ބޮޑަށް ވިސްނާނީ ފުރަތަމަ ލަނޑު ޖަހައި ލީޑު ނެގުމަށް ކަމަށް ލުބުނާނުގެ ކޯޗު އެލެގްޒަންޑަ އިލިކް ބުނެފިއެވެ.
ލުބުނާނުން ވަނީ ސާފް ޗެމްޕިއަންޝިޕުގެ ކުރިން އިންޑިއާގައި ކުރިއަށްދިޔަ އިންޓަ ކޮންޓިނެންޓަލް ކަޕުގައިވެސް ވާދަކޮށްފައެވެ. އެ މުބާރާތުގެ ފައިނަލުގައި އިންޑިއާ އަތުން ލުބުނާން ބަލިވީ 2-0 ގެ ނަތީޖާއަކުންނެވެ.
މި ފަހަރުގެ މުބާރާތުގެ ސެމީ ފައިނަލުގައި މިއަދު މި ދެ ޓީމުން ނުކުންނައިރު، މެޗުގެ ކުރިން އޮތް ނޫސްވެރިންގެ ބައްދަލުވުމުގައި ވާހަކަ ދައްކަމުން ލުބުނާންގެ ކޯޗު އިލިކް ބުނީ އިންޑިއާއަކީ ވަރުގަދަ ޓީމެއް ކަމަށާއި، ލުބުނާނުން އިންޑިއާ ބަލިކުރަން ބޭނުންވާނަމަ މެޗުގެ ކުރީކޮޅު ލީޑު ނަގަން ޖެހޭނެ ކަމަށެވެ.
ފުރަތަމަ ލަނޑު ޖަހައި ލީޑުނަގައިފި ނަމަ، ލުބުނާނަށް މެޗުގެ ތެރެއިން ގިނަ ފުރުސަތުތަކެއް ލިބިގެންދާނެ ކަމަށްވެސް އިލިކް ބުންޏެވެ. އިލިކް އިތުރަށް ބުނީ މި މެޗަށް ލުބުނާނުން ނުކުންނައިރު، އެ ޓީމުގެ އެންމެ ވަރުގަދަ ސްކޮޑް ބޭނުންކުރާނެ ކަމަށެވެ.
މި މެޗަށް ނުކުންނައިރު ސަސްޕެންޝަނުގެ ސަބަބުން އިންޑިއާގެ ކޯޗާއި ދެ ކުޅުންތެރިންއަކަށް މެޗުގައި ބައިވެރިނުވެވޭނެއެވެ. އެކަމާ ގުޅޭގޮތުން އިލިކް ބުނީ އިންޑިއާގެ ސްކޮޑަކީ ވަރުގަދަ ސްކޮޑެއް ކަމަށާއި، ސަސްޕެންޝަނުގައި ތިބި ކުޅުންތެރިންގެ ބަދަލުގައި ދެން އަރާ ކުޅުންތެރިން އެކަން ފޫބައްދާނެ ކަމަށެވެ.
ލުބުނާނާއި އިންޑިއާ ވާދަކުރާ ސެމީ ފައިނަލް މެޗު ކުޅޭނީ މިރޭ ރާއްޖެ ގަޑިން 19:00 ގައެވެ.