އިންޑިއާގެ ބެންގަލޫރުގައި މިހާރު ކުރިއަށްދާ ސާފް ބަންގަބަންދު ޗެމްޕިއަންޝިޕް 2023 ގެ ސެމީ ފައިނަލުގައި ނުކުންނަ ބަންގްލަދޭޝް ޓީމަށް ފުރިހަމައަށް އިޙުތިރާމުކުރާ ކަމަށާއި، ފުޓުބޯޅައިގައި އެއްވެސް މެޗަކީ ފަސޭހަ މެޗެއް ނޫން ކަމަށް ކުވެއިތުގެ ކޯޗު ޕޯޗުގަލުގެ ރުއީ ބެންޓޯ ބުނެފިއެވެ.
ސާފް ޗެމްޕިއަންޝިޕުގެ ސެމީ ފައިނަލަށް ކުވެއިތު ދަތުރުކުރީ ގްރޫޕް އޭގެ އެއްވަނަ ޓީމުގެ ގޮތުގައެވެ. އަދި ބަންގްލަދޭޝްއިން ސެމީގެ ޖާގައެއް ކަށަވަރުކުރީ ގްރޫޕް ބީގެ ދެވަނަ ހޯދައިގެންނެވެ.
މި މުބާރާތުގެ ސެމީ ފައިނަލް މެޗުތަކުގެ ކުރިން މިއަދު އޮތް ނޫސްވެރިންގެ ބައްދަލުވުމުގައި ވާހަކަ ދައްކަމުން ކުވެއިތުގެ ކޯޗު ބެންޓޯ ބުނީ އޭނާގެ ޓީމުން މި މުބާރާތުގައި ކުޅުނު މެޗުތަކަށް ބަލާއިރު، އަދިވެސް ރަނގަޅު ކުރަން ބައިވަރު ކަންކަން އެބަހުރި ކަމަށެވެ. އަދި މި މުބާރާތުގައި ކުޅުނު މެޗުތަކުން މިހާތަނަށް ބަލިވެފައިނުވި ނަމަވެސް، ނަތީޖާތަކަކީ އެންމެ ހިތްހަމަޖެހޭ ނަތީޖާތަކެއް ނޫން ކަމަށްވެސް ބެންޓޯ ވަނީ ބުނެފައެވެ.
ބެންޓޯ ބުނީ ބަންގްލަދޭޝް ޓީމަށް ދޭން ޖެހޭ އިޙުތިރާމު ކުވައިތުން ދޭނެ ކަމަށާއި، ފުޓްބޯޅައިގައި އެއްވެސް މެޗަކީ ފަސޭހަ މެޗުތަކެއްގެ ގޮތުގައި އެނާ ނުދެކޭ ކަމަށެވެ. އަދި ސެމީ ފައިނަލުގައި ބަންގްލަދޭޝްއާ ދެކޮޅަށް ކުޅޭ މެޗަކީވެސް އުނދަގޫ މެޗަކަށް ވާނެ ކަމަށް ބެންޓޯ ބުންޏެވެ. އަދި ސެމީ ފައިނަލް މެޗަކީ "ކޮމްޕެޓިޓިވް" މެޗަކަށްވާނެ ކަމަށް އުއްމީދު ކުރާ ކަމަށްވެސް ވަނީ ބުނެފައެވެ.
ކުވެއިތާއި ބަންގްލަދޭޝް ބައްދަލުކުރާ ސެމީ ފައިނަލް މެޗު ފަށާނީ މާދަމާ ރާއްޖެ ގަނޑިން 14:30 ގައެވެ.