ފުޓްބޯޅަ ކެރިއަރު ނިންމާލަން އަދި ނުވިސްނާ ކަމަށް އިންޑިއާގެ ކެޕްޓަން ސުނިލް ޗެތުރީ ބުނެފިއެވެ.
އިންޑިއާގެ ބެންގަލޫރުގައި މިހާރު ކުރިއަށްދާ ސާފް ބަންގަބަންދު ޗެމްޕިއަންޝިޕް 2023 ގައި ޗެތުރީ ވަނީ މިހާތަނަށް ފަސް ލަނޑު ޖަހާދީފައެވެ. މި ފަސް ލަނޑާއެކު ޗެތުރީ ވަނީ މި މުބާރާތުގައި އެންމެ ގިނަ ލަނޑު ޖަހައިގެން ރާއްޖޭގެ އަލީ އަޝްފާގު (ދަގަނޑޭ) ހަދާފައިވާ ރިކޯޑާ އަރާ ހަމަކޮށްފައެވެ. ދަގަނޑޭ މީގެ ކުރިން ރިކޯޑު ހެދީ 23 ލަނޑު ޖަހައިގެންނެވެ.
މި މުބާރާތުގެ ސެމީ ފައިނަލުގައި ލުބުނާނާ ދެކޮޅަށް ކުޅޭ މެޗުގެ ކުރިން މިއަދު އޮތް ނޫސްވެރިންގެ ބައްދަލުވުމުގައި ޗެތުރީ ބުނީ ރިކޯޑަކީ އޭނާ ވިސްނާ ކަމެއް ނޫން ކަމަށެވެ. އަދި އަމިއްލަ ރިކޯޑުތަކެއް ހެދުމަށްވުރެ ބޭނުންވަނީ ޓީމަށް ކާމިޔާބު ހޯދައިދޭން ކަމަށް ޗެތުރީ ބުންޏެވެ.
މިއީ އުމުރުން 38 އަހަރުގެ ޗެތުރީގެ ފަހު ސާފް ޗެމްޕިއަންޝިޕް ކަމަށް ބެލެވުނު ނަމަވެސް އޭނާ ބުނީ ކެރިއަރު ނިންމާލަން އަދި ނުވިސްނާ ކަމަށެވެ. އަދި އޭނާ އަބަދުވެސް ވިސްނަނީ ކުރިއަށް ހުރި މެޗުތަކަށް ކަމަށާއި، ކެރިއަރުގައި ދުރުވިސްނުމަށް ވިސްނާ ނަހަދާ ކަމަށްވެސް ވަނީ ބުނެފައެވެ.
ޗެތުރީ ބުނީ ލުބުނާން މެޗު ފަސޭހަ ނުވާނެ ކަމަށާއި، އެކަމަކު އިންޑިއާއިން ނުކުންނާނީ އެ ޓީމުގެ ގޭމު ކުޅެ، ކާމިޔާބު ހޯދަން ކަމަށެވެ. ނަމަވެސް މި މެޗަށް ލުބުނާނުން ނުކުންނާނީ، އިންޓަ ކޮންޓިނެންޓަލް ކަޕުގައި އިންޑިއާ އަތުންވި ބައްޔަށް ބަދަލުހިފަން ކަމަށް ޗެތުރީ ބުންޏެވެ.
ޗެތުރީ ބުނީ ސާފްގެ މުބާރާތެއް ވީމަ މި މުބާރާތުގެ ފައިނަލުގައި އިންޑިއާއިން ކުޅެން ބޭނުންވަނީ ބަންގްލަދޭޝްއާ ކަމަށެވެ. އެކަމަކު ބަންގްލަދޭޝް މެޗުތަކަކީ އަބަދުވެސް އިންޑިއާއަށް "ހަނގުރާމަ" އެއް ކަމަށް ޗެތުރީ ބުންޏެވެ.
ޗެތުރީ ވަނީ އިންޑިއާގެ ޤައުމީ ޓީމަށް މިހާތަނަށް ކުޅެދިން 132 މެޗުގައި 91 ލަނޑު ޖަހާދީފައެވެ.
ނޫސްވެރިންގެ މި ބައްދަލުވުމުގައި ވާހަކަ ދައްކަމުން އިންޑިއާގެ އެސިސްޓަންޓް ކޯޗު މަހޭޝް ގޯލީ ބުނީ އިންޑިއާ ޓީމުން އޮތީ ލުބުނާނާ ދެކޮޅަށް ކުޅެން ތައްޔާރަށް ކަމަށާއި، މީގެ ކުރީގެ މެޗުތަކުގައި ދެއްކި ކުޅުން މާދަމާގެ މެޗުގައިވެސް ތަކުރާރުކުރާނެ ކަމަށެވެ.