މަޑަގަސްކަރާގައި އަންނަ އޮގަސްޓް ބޭއްވުމަށް ތައްޔާރުވަމުން އަންނަ އިންޑިއަން އޯޝަން އަައިލެންޑް ގޭމްސް (އައިއޯއައިޖީ) ގައި ވާދަކުރާ ރާއްޖޭގެ ފެތުންތެރިންގެ ޤައުމީ ޓީމު އިއުލާންކޮށްފިއެވެ.
މި ގޭމްސް މަޑަގަސްކަރާގައި ބޭއްވުމަށް ނިންމާފައިވަނީ އޮގަސްޓް 25 އިން ސެޕްޓެމްބަރު މަހު ތިން ވަނަ ދުވަހުގެ ނިޔަލަށެވެ. މިފަހަރުގެ އައިއޯއައިޖީ ގައި ޖުމްލަ 12 ފެތުންތެރިން ރާއްޖެ ތަމްސީލުކުރާނެ އެވެ. އެއީ ހަ އަަންހެން ފެތުންތެރިންނާއި ހަ ފިރިހެން ފެތުންތެރިންނެވެ.
އައިއޯއައިޖީ ގައި މިފަހަރު ވާދަކުރާ ފިރިހެން ފެތުންތެރިންނަކީ މުހައްމަދު ރިހާން ޝިހާމް، އަލީ އިމްއާން، އަހުމަދު ނީޤް ނިޔާޒް، މުބާލް އައްޒާމް އިބްރާހިމް، މުހައްމަދު އާން ހުސެއިން އަދި މުހައްމަދު ޖޫދު ފަޔާޒެވެ. އަދި އަންހެން ފެތުންތެރިންނަކީ މިރާލް އައިން ލަތީފް، ހަމްނާ އަހުމަދު، އީން އައްބާސް ޝަރީފް، ހަނާން ހުސެއިން ހަލީމް، ޒައިނަބް އަބްދުﷲ ޝަފީގު އަދި އައިޝަތު ސައުސަން އެެވެ.
ރާއްޖެއިން ވާދަކުރާ ފެތުންތެރިން ހޮވާފައިވަނީ ޓައިމް ޓްރަޔަލެއް ބޭއްވުމަށް ފަހު އެވެ. މި ޓީމުގައި ހިމެނޭ ގިނަ ފެތުންތެރިން ވަނީ އެންމެ ފަހުން ރާއްޖެއިން ވާދަކުރި ބައިނަލްއަޤްވާމީ ދެ ގޭމްސްއެއްގައި ވާދަކޮށްފައެވެ. އެގޮތުން ކޮމަންވެލްތު ގޭމްސްއާއި އިސްލާމިކް ސޮލިޑާރިޓީ ގޭމްސްގައި މި ފެތުންތެރިން ވަނީ ވާދަކޮށްފައެވެ. އަދި ގިނަ ޤައުމީ ރިކޯޑުތަކެއް ވެސް އައުކޮށްފައިވެއެވެ.