އިނގިރޭސި ޕްރިމިއަރ ލީގުގެ އެވަޓަންގެ ކެޕްޓަން ސީމަސް ކޯލްމަން، އެ ޓީމުގައި އިތުރު އެއް އަހަރު މަޑުކުރަން ނިންމައިފިއެވެ.
މިގޮތުން މިއެއްބަސްވުމުގެ ދަށުން އޭނާގެ އެގްރީމަންޓް ހަމަވާނީ މިއަންނަ ސީޒަންގެ ނިޔަލަށެވެ.
އުމުރުން 34 އަހަރުގެ ކޯލްމަން އެވަޓަންގެ ކެޕްޓަން ކަމާއި ހަވާލުވެފައިވަނީ 2019 ވަނަ އަހަރުއެވެ. އަދި އޭނާ 2009 ވަނަ އަހަރު ސްލިގޯ ރޯވަރސްއިން އެވަޓަންއަށް ބަދަލުވިފަހުން މިހާތަނަށްވަނީ 409 މެޗް ކުޅެދީފައެވެ. މިއީ އޭނާ އެވަޓަންގައި ހޭދަކުރާ 15 ވަނަ ސީޒަނެވެ.
އެވަޓަންއާއެކު އާއެއްބަސްވުމެއްގައި ސޮއިކުރުމަށްފަހު ކޯލްމަން ހާމަކުރިގޮތުގައި އެވަޓަންއަކީ އޭނާއަށް ކިހާ މުހިންމު ބައެއްކަން އެންމެންނަންވެސް އެނގޭ ކަމަށާއި އެހެންކަމުން އެވަޓަންގައި އިތުރު އެއް އަހަރު މަޑުކުރުމުގެ ފުރުސަތު ލިބުމުން ވަރަށް ހިތްހަމަޖެހިފައިވާ ކަމަށެވެ.
ކޯލްމަން ހާމަކުރިގޮތުގައި މީގެ 14 އަހަރު ކުރިން އޭނާ އެވަޓަން އާއި ގުޅުމުން އޭނާ އާއި އޭނާގެ އާއިލާ އަށް މިކްލަބާއި ސަޕޯޓަރުންގެ ފަރާތުން ލިބިގެންދިޔައީ ވަރަށް ބޮޑު އެއްބާރުލުމެއް ކަމަށާއި މިހާތަނަށްވެސް އެގާތްކަން އެހުރިހާ ފަރާތްތަކެއްގެ ކިބައިން ލިބެމުންދާކަމަށެވެ. އަދި އޭނާއަށް އެވަޓަން ކަހަލަ ކްލަބެއް ތަމްސީލުކުރަން ފުރުސަތު ލިބިގެންދިއުމަކީ އޭނާއަށް ލިބިގެންދާ އުފަލެއް ކަމަށްވެސް އޭނާ ހާމަކުރިއެވެ.
ނިމިދިޔަ ސީޒަންގައި އެވަޓަން ރެލިގޭޝަނުން ސަލާމަތްވީ އެންމެ ފަހު ދުވަހު ކުޅުނު މެޗުން މޮޅުވުމުންނެވެ.