އިނގިރޭސި ޕްރިމިއަރ ލީގުން މި ފަހަރު ރެލިގޭޓުވި ލެސްޓާ ސިޓީއަށް ކުޅެމުން އައި އިންގްލަންޑުގެ ޖޭމްސް މެޑިސަން ޓޮޓްނަމް ހޮޓްސްޕާއަށް ސޮއިކޮށްފިއެވެ.
މެޑިސަން ސްޕަރސްއަށް ސޮއިކޮށްފައިވަނީ 40 މިލިއަން ޕައުންޑްގެ އަގަކަށް ފަސް އަހަރު ދުވަހުގެ އެއްބަސްވުމެއްގެ ދަށުންނެވެ. 2018 ވަނަ އަހަރު ނޯވިޗް ސިޓީއިން ލެސްޓަރއަށް ބަދަލުވި މެޑިސަންވަނީ އެޓީމަށް 203 މެޗް ކުޅެދީފައެވެ.
މިދިޔަ ސީޒަންގައި މެޑިސަންވަނީ ލެސްޓަރއަށް 10 ލަނޑު ޖަހާދީފައެވެ. ނަމަވެސް ރެލިގޭޝަނުން ލެސްޓަރ ސަލާމަތްކޮށްދެވޭގޮތެއްނުވިއެވެ. އޭނާވަނީ ލެސްޓަރއަށް ކުޅެދިން މެޗްތަކުގައި މުޅިއަކު 55 ލަނޑު ޖަހާދީ 41 އެސިސްޓް ކޮށްފައެވެ. އޭނާވަނީ 2021 ވަނަ އަހަރުގެ އެފް އޭ ކަޕް ލެސްޓަރއަށް ހޯދާދިނުމުގައި މުހިންމު ދައުރެއް އަދާކޮށްފައެވެ. މެޑިސަން ހޯދުމަށް ނިއުކާސްލް ޔުނައިޓެޑުންވެސް ކުރިން މަސައްކަތް ކުރި ނަމަވެސް އެޓީމަށް ފަހުން ވަނީ އެކަން ހުއްޓާލާފައެވެ.
ސްޕަރސްއިން ވަނީ އައު ސީޒަނަށް ސެރީއާގެ އެމްޕޯލީއަށް ކުޅެމުންދާ ކީޕަރ ގުގްލިއެލްމޯ ވިކާރިއޯވެސް އެޓީމަށް ގެންގޮސްފައެވެ. އަދި ޔުވެންޓަސްއިން ލޯން އެއްބަސްވުމެއްގެ ދަށުން ސްޕަރސްއަށް ކުޅެމުންދިޔަ ޑެޔާން ކުލުސޭވްސްކީވެސް ދާއިމީކޮށް އެކްލަބަށް ސޮއިކުރުވާފައެވެ. ނަމަވެސް ސްޕަރސްގެ އެންމެ މުހިންމު ކުޅުންތެރިޔާ ކަމަށްވާ ހެރީ ކޭންގެ މުސްތަގްބަލާމެދު މިފަހަރުވެސް އަންނަނީ ސުވާލުތަކެއް އުފެދެން ފަށާފައެވެ.
ކޭން ހޯދުމަށް ޕްރިމިއަރ ލިގުގެ އިތުުރުން ޔޫރަޕްގެ ފާހަގަކޮށްލެވޭ ބައެއް ކްލަބްތަކުން އަންނަނީ މަސައްކަތް ކުރަމުންނެވެ. މިގޮތުން ޖަރުމަނު ބުންޑަސްލީގާގެ ޗެމްޕިއަން ބަޔާން މިޔުނިކުން ވަނީ ފުރަތަމަ ހުށަހެޅުންވެސް ސްޕަރސްއަށް ހުށަހަޅާފައެވެ.