ޗެލްސީއަށް ކުޅުނު މެންޑީ ސައުދީ ލީގުގެ އަލް އަހްލީއަށް

އިނގިރޭސި ޕްރިމިއަރ ލީގުގެ ޗެލްސީއަށް ކުޅެމުން އައި ސެނެގާލުގެ ގޯލްކީޕަރު އެޑުއާޑް މެންޑީ، ސައުދީ އަރަބިއްޔާގެ ޕްރޯ ލީގުގެ އަލް އަހްލީއަށް ސޮއިކޮށްފިއެވެ.

މެންޑީ ޗެލްސީ ދޫކޮށް މިދިޔައީ އެޓީމާއި ގުޅުނުތާ ތިން އަހަރު ފަހުންނެވެ. 2020 ވަނަ އަހަރު ފްރެންޗް ލީގްގެ ރެން އިން ޗެލްސީއަށް ބަދަލުވި މެންޑީ ވަނީ އެޓީމަށް 105 މެޗް ކުޅެދީ 49 މެޗްގައި ބައިކޮޅަށް ލަނޑެއް ވަނަނުދީ ހިފަހައްޓާލާފައެވެ.

މެންޑީވަނީ 2020-2021 ވަނަ އަހަރުގެ ސީޒަންގެ ޗެމްޕިއަންސް ލީގު ޗެލްސީ ކާމިޔާބު ކުރި ޓީމްގައި މުހިންމު ދައުރެއް އަދާކޮށްފައެވެ. އަދި 2021 ވަނަ އަހަރުގެ ފީފާއިން ހޮވި ފިރިހެން އެންމެ މޮޅު ކީޕަރުގެ މަގާމާއި ޔުއޭފާގެ އަހަރުގެ އެންމެ މޮޅު ކީޕަރުގެ މަގާމްވެސް އޭނާވަނީ ހޯދާފައެވެ. އޭނާއަށް ފުރަތަމަ އެގާރައިން ޖާގަގެއްލިގެންދިޔައީ ޗެލްސީގެ ކޯޗް ކަމާއި ގްރަހަމް ޕޮޓަރ ހަވާލްވި ހިސާުންނެވެ. އަދި މިދިޔަ ސީޒަންގައި އޭނާ ބޭނުންކޮށްފައިވަނީ ބަދަލު ކީޕަރެއްގެ ގޮތުގައެވެ.

ޗެލްސީން ނެރުނު ބަޔާނެއްގައިވަނީ މެންޑީ އެކްލަބަށް ކޮށްދީފައިވާ ޚިދުމަތަށް ޝުކުރު އަދާކޮށްފައެވެ. އަދި 2021 ވަނަ އަހަރުގެ ޗެމްޕިއަންސް ލީގު ހޯދުމުގައި އޭނާ ކުޅެފައިވާ މުހިންމު ދައުރުގެ ސަބަބުން އޭނާއަށް އަބަދުވެސް އެކްލަބްގެ ތާރީހުގައި ހާއްސަ ޖާގައެއް ލިބިގެންދާނެކަން ފާހަގަކޮށްފައިވެއެވެ.

މެންޑީ އަކީ މިސީޒަންގައި ސައުދި ޕްރޯ ލީގަށް ބަދަލުވަމުންދާ ފާހަގަކޮށްލެވޭ ކުޅުންތެރިންގެ ލިސްޓަށް އެންމެ ފަހުން އިތުރު ވި ނަމަށްވާއިރު މިއީ އެންމެ ފަހު ނަމަށް ވެގެން ނުދާނެކަމަށް ބައެއް ފަރާތްތަކުން ހާމަކުރެއެވެ. މީގެއިތުރުން މެންޑީ އަކީ މިފަހަރު ޗެލްސީއިން ސައުދީ ޕްރޯ ލީގަށް ބަދަލުވި ތިން ވަނަ ކުޅުންތެރިޔާއެވެ.

މީގެއިތުރުން އެކްލަބްގެ ހާކިމް ޒިޔެޗް ހޯދުމަށްވެސް ސައުދީ ޕްރޯ ލީގުގެ ޓީމްތަކުން މަސައްކަތް ކުރަމުން އަންނަ ކަމަށްވެއެވެ.