މި ފަހަރުގެ ސާފް ޗެމްޕިއަންޝިޕުގެ ސެމީ ފައިނަލަށް ބަންގްލަދޭޝް ދަތުރުކުރުމުން މި ފެންނަނީ 2022 ވަނަ އަހަރު އެ ޤައުމުގެ ފުޓްބޯޅަ ކުރިއެރުވުމަށް ފެށި ޕްރޮގްރާމުގެ ކާމިޔާބީގެ މަންޒަރު ކަމަށް އެ ޓީމުގެ ކޯޗު ހަވިއޭ ކަބްރޭރާ ބުނެފިއެވެ.
ބޫޓާން ބަލިކޮށް ބަންގްލަދޭޝްއިން މުބާރާތުގެ ސެމީ ފައިނަލުގެ ޖާގަ ކަށަވަރުކުރީ ކުޅުނު ދެ މެޗުން ލިބުނު ހަ ޕޮއިންޓާއެކުގައެވެ. އެއާއެކު ސެމީ ފައިނަލުގައި ބަންގްލަދޭޝް ބައްދަލުކުރަން ޖެހޭނީ ގްރޫޕް އޭގެ އެއްވަނަ ކުވެއިތާއެވެ.
ބޫޓާން މެޗަށް ފަހު އޮތް ނޫސްވެރިންގެ ބައްދަލުވުމުގައި ވާހަކަ ދައްކަމުން ކަބްރޭރާ ބުނީ ބަންގްލަދޭޝްއިން ފުޓްބޯޅައިގެ އިސްލާހީ މަސައްކަތްތައް 2022 ވަނަ އަހަރުގެ ޖަނަވަރީ މަހު ފަށާފައިވާ ކަމަށެވެ. އެގޮތުން އެ ދުވަހު ފެށުނު ޕްރޮގްރާމުގެ ކާމިޔާބީ މިއަދު ފެންނަމުންދާ ކަމަށް ކަބްރޭރާ ބުންޏެވެ.
ކަބްރޭރާ ބުނީ ކުވެއިތު، ލުބުނާން އަދި އިންޑިއާއެކު މުބާރާތުގެ ސެމީ ފައިނަލުގެ ފުރުސަތު ލިބުން އެއީ ބަންގްލަދޭޝް ފުޓްބޯޅައަށް ލިބުނު ކާމިޔާބީއަކާ ފަޚުރެއް ކަމަށެވެ. އަދި ސެމީ ފައިނަލުގައި ކުވެއިތާ ދެކޮޅަށް ކުޅޭ މެޗު ފަސޭހަ ނުވާނެ ކަމަށާއި، އެކަމަކު އެ މެޗަށްވެސް ބަންގްލަދޭޝްއިން ނުކުންނާނީ ރަނގަޅު "ފައިޓެއް" ދޭން ކަމަށްވެސް ބުންޏެވެ.
ނޫސްވެރިންގެ މި ބައްދަލުވުމުގައި ވާހަކަ ދައްކަމުން ބޫޓާންގެ ކޯޗު ޗެކީ ވަންގްމޯ ބުނީ މި މުބާރާތުގައި އޭނާގެ ޓީމުން ޖުމްލަކޮށް ދެއްކި ކުޅުމާއި މެދު ހިތްހަމަޖެހޭ ކަމަށެވެ. އެކަމަކު ބޫޓާންގެ ފުޓުބޯޅަ ރަނގަޅު ކުރަން ބޭނުންވާނަމަ ގިނަ ބަދަލުތަކެއް އަންނަން ޖެހޭ ކަމަށް ވަންގްމޯ ބުންޏެވެ.
ވަންގްމޯ ބުނީ ޒުވާން ކުޅުންތެރިންނާއެކު ބޫޓާން މުސްތަގުބޮލުގައި ފެންނާނީ ވަރުގަދަ ޓީމެއްގެ ގޮތުގައި ކަމަށެވެ. އެކަމަކު މިހާރަށް ބަލާއިރު، ބޫޓާންއަކީ އަދިވެސް މި ސަރަހައްދުގައި ދެން ތިބި ޓީމުތަކަށްވުރެ ދަށް ޓީމެއްކަމަށެވެ. އެކަން ބަދަލުވާނެ ކަމަށްވެސް ވަންގްމޯ ބުންޏެވެ.