އިންޑިއާގެ ބެންގަލޫރުގައި މިހާރު ކުރިއަށްދާ ސާފް ބަންގަބަންދު ޗެމްޕިއަންޝިޕް 2023 ގެ ގްރޫޕް ބީގެ ފަހު މެޗުން ބޫޓާން އަތުން ބަންގްލަދޭޝް މޮޅުވުމާއެކު، ރާއްޖެ މުބާރާތުން ކަޓައިފިއެވެ.
ބެންގަލޫރުގެ ސްރީ ކަންތީރަވާ ސްޓޭޑިއަމްގައި މިރޭ ކުޅުނު މެޗު ބަންގްލަދޭޝްއިން ކާމިޔާބުކުރީ 3-1 ގެ ނަތީޖާއަކުންނެވެ. މި ނަތީޖާއާއެކު ބަންގްލަދޭޝް ވަނީ މުބާރާތުގެ ސެމީ ފައިނަލަށް ދަތުރުކޮށްފައެވެ.
މި މެޗުގެ ވަރަށް ކުރީކޮޅު ބޫޓާނުން ވަނީ ލަނޑު ޖަހައި ލީޑު ނަގާފައެވެ. މެޗުގެ 12 ވަނަ މިނެޓުގައި މި ލަނޑު އެ ޓީމަށް ކާމިޔާބުކޮށްދިނީ ސެންޑާ ޑޯޖީއެވެ. މިއީ އޭރިއާ ބޭރުން ފޮނުވާލި ބާރު ހަމަލާއަކުން އޭނާ ކާމިޔާބުކުރި ލަނޑެކެވެ.
މި ލަނޑާއެކު ބަންގްލަދޭޝްއިން އެ ޓީމުގެ ކުޅުން ރަނގަޅުކޮށް ބޫޓާންގެ ހާފަށް ބާރުބޮޑުކުރިއިރު، މެޗުގެ 21 ވަނަ މިނެޓުގައި އެ ޓީމުން ވަނީ ނަތީޖާ ހަމަހަމަކޮށްފައެވެ. މި ލަނޑު ބަންގްލަދޭޝަށް ޖަހައިދިނީ ޝެއިޚް މޯސަލިންއެވެ. އަދި އޭގެ ދިހަ މިނެޓު ފަހުން ބަންގްލަދޭޝްއިން ވަނީ އިތުރު ލަނޑެއް ޖަހައި ލީޑު ނަގާފައެވެ. މިއީ ބޫޓާންގެ ފުންޓްސޯ ޖިގްމޭ އަތުން ބައިކޮޅަށް ވަން ލަނޑެކެވެ.
މި މެޗުގެ ފުރަތަމަ ހާފު ނިމުމުގެ ކުރިން ބަންގްލަދޭޝްއިން ވަނީ އިތުރު ލަނޑެއް ޖަހައި ލީޑު ފުޅާކޮށްފައެވެ. މި ލަނޑު އެ ޓީމަށް ކާމިޔާބުކޮށްދިނީ މެޗުގައި މޮޅު ކުޅުމެއް ދެއްކި ރާކިބް ހުސައިނެވެ.
މި މެޗުގެ ދެވަނަ ހާފުގައި ބޫޓާނުން ބަންގްލަދޭޝްގެ ހާފަށް ބާރުބޮޑުކޮށް ގިނަ ހަމަލާތަކެއް އުފައްދަން މަސައްކަތްކުރިއެވެ. އެގޮތުން މެޗުގެ 61 ވަނަ މިނެޓުގައި ބޫޓާންގެ ސެންޑާ ޑޯޖީ އޭރިއާ ބޭރުން ފޮނުވާލި ބާރު ހަމަލާ ދިޔައީ ގޯލުގެ އަރިމަތީ ދަނޑި ކައިރިން ބޭރަށެވެ.
މި ނަތީޖާއާއެކު ބަންގްލަދޭޝް ސެމީ ފައިނަލަށް ދަތުރުކުރީ ކުޅުނު ތިން މެޗުން ލިބުނު ހަ ޕޮއިންޓާއެކުގައެވެ. ގްރޫޕް ބީގެ އެއްވަނައަށް ދިޔައީ ކުޅުނު ތިން މެޗުވެސް ކާމިޔާބުކުރި ލުބުނާނެވެ. އެ ޓީމަށް ވަނީ ތިން މެޗުން ނުވަ ޕޮއިންޓް ލިބިފައެވެ. މި ނަތީޖާއާއެކު މި މުބާރާތުގެ ގްރޫޕް ސްޓޭޖުން ރާއްޖެ ކެޓިއިރު، މިއީ ސާފް ޗެމްޕިއަންޝިޕުގެ ތާރީޚުގައިވެސް ރާއްޖެ ގްރޫޕް ސްޓޭޖުން ކެޓި ފުރަތަމަ ފަހަރެވެ.
މި މުބާރާތުގެ ސެމީ ފައިނަލުގައި ބަންގްލަދޭޝް ބައްދަލުކުރަން ޖެހޭނީ ކުވެއިތާއެވެ. އަދި ލުބުނާނުން ސެމީ ފައިނަލުގައި ނުކުންނާނީ މުބާރާތް ބާއްވާ ޤައުމު އިންޑިއާއާ ދެކޮޅަށެވެ.