އިންޑިއާގެ ބެންގަލޫރުގައި މިހާރު ކުރިއަށްދާ ސާފް ބަންގަބަންދު ޗެމްޕިއަންޝިޕް 2023 ގެ ގްރޫޕް ބީގައި ލުބުނާން އަތުން ބަލިވެ، ފުރަތަމަ ފަހަރަށް މުބާރާތުގެ ގުރޫޕް ސްޓޭޖުން ކެޓުމާ ގާތަށް ރާއްޖެ ހިނގައްޖެއެވެ.
ބެންގަލޫރުގެ ސްރީ ކަންތީރަވާ ސްޓޭޑިއަމުގައި މިއަދު ހަވީރު ކުޅުނު މެޗުގައި ލުބުނާން އަތުން ރާއްޖެ ބަލިވީ 1-0 ގެ ނަތީޖާއަކުންނެވެ.
މި މެޗު ފަށައިގެން ލުބުނާނުން ރާއްޖޭގެ ހާފަށް ބާރުބޮޑުކުރިއިރު، ފުރަތަމަ ހާފުގައި ރާއްޖޭގެ ޓީމުން ކުޅުނީ ޑިފެންސްއަށް ވިސްނައިގެންނެވެ. މި ހާފުގެ 10 ވަނަ މިނެޓުގައި ރާއްޖޭގެ އިބްރާހީމް އައިސަމް އޭރިއާ ބޭރުން ފޮނުވާލި ބާރު ހަމަލާއެއް ދިޔައީ ގޯލުގެ ހުރަސް ދަނޑި ކައިރިން ބޭރަށެވެ.
މި މެޗުގައި ފެނިގެންދިޔަ ހަމައެކަނި ލަނޑު ލުބުނާނުން ކާމިޔާބުކޮށްފައިވަނީ މެޗުގެ 24 ވަނަ މިނެޓުގައެވެ. ރާއްޖޭގެ ޕެނަލްޓީ އޭރިއާ ކައިރިން ލިބުނު ހިލޭ ޖެހުމަކުން މި ލަނޑު އެ ޓީމަށް ކާމިޔާބުކޮށްދިނީ ހަސަން މާތޫކެވެ. މި ލަނޑަށްފަހުވެސް މާތޫކްއަށް ވަނީ ލަނޑު ޖަހަން ހުސް ފުރުސަތެއް ލިބި ބޭކާރުވެފައެވެ. އޭރިއާ ތެރެއިން މުޅިން ހުހަށްހުރެ އޭނާ ބޮލުން ފޮނުވާލި ހަމަލާގެ ހުރަހަކަށްވީ ރާއްޖޭގެ ގޯލްކީޕަރު ހުސެއިން ޝަރީފެވެ.
މި މެޗުގެ ދެވަނަ ހާފު ފަށައިގެން ލުބުނާނުން އެޓޭކުތައް ވަރުގަދަކުރިއިރު، މެޗުގެ 49 ވަނަ މިނެޓުގައި އެ ޓީމުގެ މެކްސިމް އައޮން އޯވަހެޑް ކިކުން ފޮނުވާލި ބާރު ހަމަލާ ރާއްޖޭގެ ކީޕަރު ހުސެން ވަނީ ހުށިޔާރުކަމާއެކު ދިފާއުކޮށްފައެވެ. އޭގެ ފަހުން ރާއްޖެއިން ކުޅުން ރަނގަޅުކޮށް ލުބުނާންގެ ގޯލަށް ނުރައްކާކުރެވޭތޯ ބެލި ނަމަވެސް، ލުބުނާނުގެ ޑިފެންސް ފެނިގެންދިޔައީ ވަރަށް އޯގަނައިޒްކޮށެވެ.
މި މެޗުގެ އިތުރު ވަގުތުގައި ލުބުނާންގެ މުޙައްމަދު ސަޑެކް ކައިރިކައިރީގައި ފޮނުވާލި ދެ ހަމަލާވެސް ރާއްޖޭގެ ކީޕަރު ހުސެއިން ވަނީ ދިފާއުކޮށްފައެވެ.
މި ނަތީޖާއާއެކު ސެމީ ފައިނަލުގައި ލުބުނާނުން ވާދަކުރަން ޖެހޭނީ ގްރޫޕް ބީގެ ދެވަނައަށްދިޔަ އިންޑިއާ އާއެވެ. ރާއްޖެއަށް ސެމީގެ ޖާގައެއް ހޯދުމުގެ ފުރުސަތު ހަނިވެފައިވާއިރު، ސެމީގެ ޖާގައެއް ލިބޭނީ މިރޭ ބަންގްލަދޭޝްގެ މައްޗަށް 3-0 ގެ ނަތީޖާއަކުން ބޫޓާން ކުރިހޯދައިފި ނަމައެވެ.