ސާފް ޗެމްޕިއަންޝިޕް ފުޓްބޯޅަ މުބާރާތުގައި އެންމެ ގިނަ ލަނޑު ޖަހައިގެން ރާއްޖޭގެ އަލީ އަޝްފާގު (ދަގަނޑޭ) ހަދާފައިވާ ރިކޯޑާ، އިންޑިއާގެ ކެޕްޓަން ސުނިލް ޗެތުރީ އަރާ ހަމަކޮށްފިއެވެ.
ސާފް ޗެމްޕިއަންޝިޕުގައި ދަގަނޑޭ ވަނީ މީގެ ކުރިން 23 ލަނޑު ޖަހާފައެވެ. މި ރިކޯޑާ ޗެތުރީ އަރާ ހަމަކުރީ މިރޭ ކުވެއިތާ ދެކޮޅަށް ކުޅުނު މެޗުގައި ޖެހި ލަނޑާއެކުގައެވެ. ނަމަވެސް ސާފް ޗެމްޕިއަންޝިޕުގައި ދަގަނޑޭ 23 ލަނޑު ޖަހާފައިވަނީ ޗެތުރީއަށްވުރެ މަދު މެޗު ކުޅެގެންނެވެ.
ޗެތުރީ ވަނީ އިންޑިއާގެ ޤައުމީ ޓީމަށް މިހާތަނަށް ޖުމްލަ 95 ލަނޑު ޖަހާފައެވެ. އޭނާއަކީ ކްރިސްޓިއާނޯ ރޮނާލްޑޯ އަދި ލިއޮނަލް މެސީގެ ފަހަތުން ޤައުމީ ޓީމަކަށް އެންމެ ގިނަ ލަނޑު ޖަހާފައިވާ ކުޅުންތެރިޔާއެވެ.
ޗެތުރީ ވަނީ މި ފަހަރުގެ ސާފް ޗެމްޕިއަންޝިޕުގައި އެކަނިވެސް ފަސް ލަނޑު ޖަހާފައެވެ. އަދި ރާއްޖޭގައި 2021 ވަނަ އަހަރު ކުރިއަށްދިޔަ ސާފް ޗެމްޕިއަންޝިޕުގައިވެސް އެންމެ ގިނަ ލަނޑު ޖެހި ކުޅުންތެރިޔަކީ ޗެތުރީއެވެ.
ކުވެއިތު މެޗަށްފަހު ވާހަކަ ދައްކަމުން އިންޑިއާގެ އެސިސްޓަންޓް ކޯޗު މަޙޭޝް ގޯލީ ވަނީ ޗެތުރީއަށް ތައުރީފުކޮށްފައެވެ. އެގޮތުން މަހޭޝް ބުނީ އުމުރުން 37 އަހަރުގެ ޗެތުރީގެ ކުޅުން ބަލާއިރު، ފެންނަނީ 21 އަހަރުގެ ކުޅުންތެރިއެއްގެ ކުޅުން ކަމަށެވެ.