އިންޑިއާގެ ބެންގަލޫރުގައި މިހާރު ކުރިއަށްދާ ސާފް ބަންގަބަންދު ޗެމްޕިއަންޝިޕް 2023 ގެ ގްރޫޕް އޭގެ ފަހު މެޗުގައި އިންޑިއާއާ އެއްވަރުކޮށް ކުވަތުން ގްރޫޕުގެ އެއްވަނަ ހޯދައިފިއެވެ.
ބެންގަލޫރުގެ ސްރީ ކަންތީރަވާ ސްޓޭޑިއަމުގައި މިރޭ ކުޅުނު މެޗު އެއްވަރުވީ 1-1 ގެ ނަތީޖާއަކުންނެވެ.
މި މެޗުގެ ވަރަށް ކުރީކޮޅު ކުވެއިތަށް ވަނީ ލަނޑު ޖަހަން ރަނގަޅު ފުރުސަތެއް ލިބި ބޭކާރުވެފައެވެ. އެގޮތުން މެޗުގެ ހަތަރުވަނަ މިނެޓުގައި ކުވެއިތުގެ މުޙައްމަދު އަބްދުﷲ ފޮނުވާލި ބާރު ހަމަލާ ދިޔައީ އިންޑިއާގެ ގޯލުގެ ހުރަސް ދަނޑި މަތިން ބޭރަށެވެ.
އޭގެ ފަހުން މެޗުގެ 20 ވަނަ މިނެޓުގައިވެސް ކުވެއިތުން ވަނީ ނުރައްކާތެރި ހަމަލާއެއް ފޮނުވާލާފައެވެ. އެ ޓީމުގެ ޝަބައިބް އަލް ޚަލްދީ އޭރިއާ ބޭރުން ފޮނުވާލި ބާރު ހަމަލާވެސް ދިޔައީ ގޯލުގެ ހުރަސް ދަނޑިމަތިން ބޭރަށެވެ. އަދި މެޗުގެ 25 ވަނަ މިނެޓުގައި ކުވެއިތުގެ މުޙައްމަދު އަބްދުﷲ ލަނޑެއް ޖެހި ނަމަވެސް، ލައިންސްމަން ވަނީ އޭނާ ހުރީ އޮފްސައިޑުގައި ކަމަށް ނިންމާފައެވެ.
އެއާއެކު މި މެޗުގައި އެންމެ ފުރަތަމަ ލަނޑު ޖަހައި ލީޑު ނެގީ އިންޑިއާއިންނެވެ. ފުރަތަމަ ހާފުގެ ފަހު މިނެޓުގައި މި ލަނޑު އެ ޓީމަށް ކާމިޔާބުކޮށްދިނީ ކެޕްޓަން ސުނިލް ޗެތުރީއެވެ. މި ލަނޑާއެކު ސާފް ޗެމްޕިއަންޝިޕުގެ ތާރީޚުގައި ޗެތުރީ ވަނީ އެންމެ ގިނަ ލަނޑު ޖަހައިގެން ރާއްޖޭގެ އަލީ އަޝްފާގު (ދަގަނޑޭ) ހަދާފައިވާ ރިކޯޑާ އަރާ ހަމަކޮށްފައެވެ. އެގޮތުން މި ދެ ކުޅުންތެރިން ވަނީ މިހާތަނަށް 23 ލަނޑު ޖަހާފައެވެ.
މި މެޗުގެ ދެވަނަ ހާފުގައި ދެ ޓީމުގެ ފަރާތުން ހަމަހަމަ ކުޅުމެއް ފެނިގެންދިޔައިރު، މި މެޗުގެ 51 ވަނަ މިނެޓުގައި އިންޑިއާގެ މުޙައްމަދު ކުރުނިޔަން ފޮނުވާލި ބާރު ހަމަލާ ދިޔައީ ގޯލާ އަމާޒުނެވެ ބޭރަށެވެ. އޭގެ ފަހުން މެޗުގެ 57 ވަނަ މިނެޓުގައި ކުވެއިތުގެ ޝަބައިބް އަލް ޚަލްދީ ހިލޭ ޖެހެމަކުން ފޮނުވާލި ނުރައްކާތެރި ހަމަލާ، އިންޑިއާގެ ގޯލްކީޕަރު އަމްރިންދަރު ސިންހް ވަނީ ހުށިޔާރުކަމާއެކު ދިފާއުކޮށްފައެވެ.
މި މެޗުގެ 80 ވަނަ މިނެޓުގައި އިންޑިއާގެ ކޯޗު އިގޯ ސްޓިމަކަށް ވަނީ ރަތް ކާޑެއް ދައްކާފައެވެ. ސްޓިމަކަށް ރަތް ކާޑު ދެއްކީ ރެފުރީގެ ނިންމުންތަކާ ތަކުރާރުކޮށް ނުރުހުން ފާޅުކުރުމާ ގުޅިގެންނެވެ. މީގެ ކުރިން މި މުބާރާތުގައި ޕާކިސްތާނާ ދެކޮޅަށް އިންޑިއާ ކުޅުނު މެޗުގައިވެސް ސްޓިމަކަށް ވަނީ ރަތް ކާޑެއް ދައްކާފައެވެ.
މި މެޗުގެ 85 ވަނަ މިނެޓުގައި ކުވެއިތަށް ވަނީ ލަނޑު ޖަހަން ރަނުގެ ފުރުސަތެއް ލިބި ބޭކާރުވެފައެވެ. އެގޮތުން އެ ޓީމުގެ ޝަބައިބް އަލް ޚަލްދީ ފޮނުވާލި ބާރު ހަމަލާގެ ހުރަހަކަށްވީ އިންޑިއާގެ ކީޕަރު އަންރިންދަރެވެ.
އޭގެ ފަހުން މެޗުގެ އިތުރު ވަގުތުގައި ހިނގާދިޔަ ހަމަނުޖެހުމަކާ ގުޅިގެން ކުވެއިތުގެ ހަމަދް އަލް ގަލަފް އާއި އިންޑިއާގެ ރަހިމް އަލީއަށް ވަނީ ރަތް ކާޑު ދައްކާފައެވެ. އަދި އޭގެ އިރުކޮޅެއް ފަހުން ކުވެއިތުން ވަނީ ލަނޑެއް ޖަހާ ނަތީޖާ ހަމަހަމަކޮށްފައެވެ. މިއީ އިންޑިއާގެ އަންވަރު އަލީ އަތުން ބައިކޮޅަށް ވަން ލަނޑެކެވެ.
މި ނަތީޖާއާއެކު ގްރޫޕް އޭގެ އެއްވަނަ ކުވެއިތަށް ލިބުނީ ކުޅުނު ތިން މެޗުން ހޯދި ހަތް ޕޮއިންޓާއެކުގައެވެ. އިންޑިއާއަށްވެސް ހަތް ޕޮއިންޓް ލިބިފައިވާއިރު، ކުވެއިތަށް ކުރި ލިބެނީ ފައިދާ ލަނޑުގެ ތަފާތުންނެވެ.
މި މެޗަށް ނުކުތްއިރުވެސް މި ދެ ޓީމު އޮތީ ސެމީ ފައިނަލުގެ ޖާގަ ކަށަވަރުކޮށްފައެވެ. ސެމީގައި މި ދެ ޓީމު ބައްދަލުކުރާނެ ޓީމުތައް އެނގިގެންދާނީ މާދަމާ ކުޅޭ ގްރޫޕް ބީގެ މެޗުތަކަށް ފަހުގައެވެ.