އިންޑިއާގެ ބެންގަލޫރުގައި މިހާރު ކުރިއަށްދާ ސާފް ބަންގަބަންދު ޗެމްޕިއަންޝިޕް 2023 ގެ ގްރޫޕް ސްޓޭޖުން ނޭޕާލް ކެޓި ނަމަވެސް، މުސްތަގުބަލު އުޖާލާ ކަމަށް އެ ޓީމުގެ ކޯޗު ވިންޗެންޒޯ އަލްބާޓޯ ބުނެފިއެވެ.
ނޭޕާލުން މި މުބާރާތް ނިންމާލީ އެންމެ މޮޅަކާއެކުގައެވެ. ގްރޫޕް އޭގައި އެ ޓީމުން ކުޅުނު ފަހު މެޗުގައި ޕާކިސްތާން އަތުން ކުރިހޯދީ 1-0 ގެ ނަތީޖާއަކުންނެވެ.
މި މެޗަށްފަހު އޮތް ނޫސްވެރިންގެ ބައްދަލުވުމުގައި ވާހަކަ ދައްކަމުން ނޭޕާލް ޓީމުގެ ކޯޗު އަލްބާޓޯ ބުނީ ނޭޕާލުން މި މުބާރާތަށް ނުކުތީ ޒުވާން ޓީމަކާއެކުގައި ކަމަށެވެ. އަދި ޒުވާން ޓީމަކާ ބަލާ ނޭޕާލުން މި މުބާރާތުގައި ދެއްކި ކުޅުމާމެދު ފަޚުރުވެރިވާ ކަމަށްވެސް ބުންޏެވެ.
އަލްބާޓޯ ބުނީ ނޭޕާލާކީ ޒުވާން ޓީމެއް ކަމަށާއި، އެހެންކަމުން އޭނާގެ ޓީމަކީ މުސްތަގުބަލުގައި ރަނގަޅު މޮޅު ޓީމަކަށް ވާނެ ކަމަށެވެ. އަދި ނޭޕާލުން މި މުބާރާތަށް ނުކުތީ ރަނގަޅު ފަރިތަކުރުންތަކެއް ނުލިބި ކަމަށާއި، އެކަމަކު މުބާރާތުގައި ރަނގަޅަށް ކުޅުނު ކަމަށްވެސް ބުންޏެވެ.
ނޫސްވެރިންގެ މި ބައްދަލުވުމުގައި ވާހަކަ ދައްކަމުން ޕާކިސްތާނުގެ ކޯޗު ޝަހުޒާރު އަންވަރު ބުނީ އެ ޓީމަށް ހިތްދަތި ގޮތަކަށް މުބާރާތް ނިންމާލަން ޖެހުނު ކަމުގައިވީ ނަމަވެސް، މިއީ ލިބުނު ފިލާވަޅެއް ކަމަށް ބަލައި، މި ފިލާވަޅުން އިބުރަތް ހާސިލުކޮށް ކަންތައްތަކެއް ރަނގަޅު ކުރާނެ ކަމަށެވެ.
ޝަހުރުޒާދު ބުނީ ޕާކިސްތާން ފުޓްބޯޅަ މިހާރު އޮތީ ރީ-ބިލްޑިންގް ފޭސްއެއްގައި ކަމަށާއި، އެ ޓީމަށް މިހާރު މުހިންމީ އެއް މުބާރާތަށްވުރެ އަނެއް މުބާރާތުގައި ރަނގަޅަށް ޓީމެއްގެ ގޮތުގައި ކުރިއަރާ ދިޔުން ކަމަށެވެ.
ސާފް ޗެމްޕިއަންޝިޕުގައި ޕާކިސްތާނުން އެއް އަހަރުގެ މެދު ކެނޑުމަކަށްފަހު ވާދަކުރިއިރު، އެ ޓީމުން ވަނީ ތިން މެޗުންވެސް ބަލިވެފައެވެ. އަދި އެ ޓީމު ކޮޅަށް މި މުބާރާތުގައި ވަނީ ނުވަ ލަނޑު ވަދެފައެވެ.