އިންޑިއާގެ ބެންގަލޫރުގައި މިހާރު ކުރިއަށްދާ ސާފް ބަންގަބަންދު ޗެމްޕިއަންޝިޕް 2023 ގެ ގްރޫޕް އޭގެ ފަހު މެޗުގައި ނޭޕާލުން ޕާކިސްތާން ބަލިކޮށްފިއެވެ.
ސިރީ ކަންތީރަވާ ސްޓޭޑިއަމުގައި މިއަދު ހަވީރު ކުޅުނު މެޗު ނޭޕާލުން ކާމިޔާބުކުރީ 1-0 ގެ ނަތީޖާއަކުންނެވެ. މި މެޗަށް ނުކުތްއިރުވެސް މި ދެ ޓީމު ވަނީ މުބާރާތުން ކަޓާފައެވެ.
މެޗު ފަށައިގެން ދެ ޓީމުގެ ފަރާތުން ދާދި ހަމަހަމަ ކުޅުމެއް ފެނިގެންދިޔައިރު، މެޗުގެ 12 ވަނަ މިނެޓުގައި ނޭޕާލަށް ވަނީ ޕާކިސްތާނުގެ އޭރިއާ ރޮނގުމަތިން ކަހަލަ ގޮތަކަށް ހިލޭ ޖެހުމެއް ލިބިފައެވެ. ނޭޕާލުގެ ބިމާލް ގަދްރީ މަރަތު ފޮނުވާލި އެ ހިލޭ ޖެހުން ދިޔައީ ގޯލުގެ ހުރަސް ދަނޑި ކައިރިން ބޭރަށެވެ.
އޭގެ ފަހުން މެޗުގެ 31 ވަނަ މިނެޓުގައި ޕާކިސްތާންގެ އަލަމްގީރް އަލީ ޚާނަށް ވަނީ ރަނގަޅު ފުރުސަތެއް ލިބި ބޭކާރުވެފައެވެ. ނޭޕާލުގެ އޭރިއާ ތެރެއިން އޭނާ ފޮނުވާލި ހަމަލާގެ ހުރަހަކަށްވީ ނޭޕާލުގެ ގޯލްކީޕަރު ކިރަން ކުމާރެވެ.
މި މެޗުގެ 42 ވަނަ މިނެޓުގައި ނޭޕާލުން ވަނީ ކައިރިކަރީގައި ދެ ހަމަލާ ފޮނުވާލާފައެވެ. އެކަމަކު މި ހަމަލާތަކުގެ ހުރަހަކަށްވީ ޕާކިސްތާނުގެ ޑިފެންޑަރުންނެވެ.
މި މެޗުގެ ދެވަނަ ހާފު ފަށައިގެންވެސް ދެ ޓީމުގެ ފަރާތުން ފެނުނީ ހަމަހަމަ ކުޅުމެކެވެ. މެޗުގެ 51 ވަނަ މިނެޓުގައި ނޭޕާލުގެ އަރިކް ބިސްތާ ފޮނުވާލި ނުރައްކާތެރި ހަމަލާ ދިޔައީ ގޯލާ އަމާޒުނުވެ ބޭރަށެވެ. އޭގެ ފަހުން މެޗުގެ 61 ވަނަ މިނެޓުގައި ނޭޕާލްގެ މަނީޝް ޑަންގީއަށް ވަނީ މުޅިން ހުސް ފުރުސަތެއް ލިބި ބޭކާރުވެފައެވެ. ޕާކިސްތާނުގެ އޭރިއާ ތެރޭގައި މުޅިން ހުސްކޮށްހުރެ އޭނާ ފޮނުވާލި ހަމަލާ، ޕާކިސްތާނުގެ ކީޕަރު ޔޫސުފް ބަޓް ވަނީ ހުށިޔާރުކަމާއެކު ދިފާއުކޮށްފައެވެ.
ނަމަވެސް މެޗުގެ 79 ވަނަ މިނެޓުގައި ނޭޕާލުން ވަނީ ލަނޑެއް ޖަހައި ލީޑު ނަގާފައެވެ. އޭރިއާ ބޭރުން ފޮނުވާލި ހަމަލާއަކުން މި ލަނޑު އެ ޓީމަށް ކާމިޔާބުކޮށްދިނީ އާޝިޝް ޗޯދަރީއެވެ.
މި މޮޅާއެކު ނޭޕާލުން މި މުބާރާތް ނިންމާލީ ގްރޫޕްގެ ތިންވަނައިގައި އޮވެއެވެ. އެ ޓީމަށް ކުޅުނު ތިން މެޗުން ލިބިފައިވަނީ ތިން ޕޮއިންޓެވެ.