އިންޑިއާގެ ބެންގަލޫރުގައި މިހާރު ކުރިއަށްދާ ސާފް ބަންގަބަންދު ޗެމްޕިއަންޝިޕް 2023 ގެ ގްރޫޕް އޭގެ ފަހު މެޗުގައި އިންޑިއާއާ ދެކޮޅަށް ނުކުތަސް ކުޅޭނީ ކުރިން ދެ މެޗުގައިވެސް ކުޅުނު ގޭމު ކަމަށް ކުވެއިތުގެ ކޯޗު ޕޯޗުގަލުގެ ރުއީ ބެންޓޯ ބުނެފިއެވެ.
ބެންޓޯ ބުނީ އޭނާގެ ޓީމުން ކުރީ ދެ މެޗުގައި އުނދަގޫ ހާލަތެއްގައި ރަނގަޅު މޮޅުތަކެއް ހޯދުނު ކަމުގައިވީ ނަމަވެސް، އަދިވެސް މިއަށްވުރެ ރަނގަޅަށް އޭނާގެ ޓީމަށް ކުޅެވޭނެ ކަމަށެވެ.
އިންޑިއާގެ ސަޕޯޓަރުން ކުރިމަތީ އެ ޓީމުން އަމިއްލަ ޤައުމުގައި މެޗުތައް ކުޅުނަސް، ކުވެއިތުން އަބަދުވެސް ވިސްނާނީ އަމިއްލަ ކޮންޓްރޯލްގައި ހުރި ކަންކަމަށް ކަމަށް ކޯޗު ބެންޓޯ ބުންޏެވެ. ބެންޓޯ ބުނީ އިދިކޮޅު ޓީމުގެ ކަންކަމަށް ބަލައުގެން ކަންކަން ކުރަންވެއްޖެ ނަމަ، އޭނާގެ ޓީމުގެ އަމާޒެއް ނޯންނާނެ ކަމަށެވެ. އެހެންކަމުން އިންޑިއާ މެޗަށް އޭނާގެ ޓީމުން ނުކުންނާނީ ކުރީ ދެ މެޗެކޭ އެއްގޮތަށް މޮޅުވުމުގެ އަމާޒުގައި ކަމަށްވެސް ކޯޗު ބެންޓޯ ފާހަގަކުރިއެވެ.
ކުވެއިތުން ވަނީ ގްރޫޕް ސްޓޭޖުގައި ކުޅުނު ދެ މެޗުގައި އެ ޓީމުގެ ގިނަ ކުޅުންތެރިންނަށް ކުޅުމުގެ ފުރުސަތު ދީފައެވެ. ބެންޓޯ ބުނީ ޤައުމީ ޓީމުގައި ބަދަލުކުޅުންތެރިން ނުތިބޭނެ ކަމަށާއި، މުޅިންވެސް ތިބޭނީ މުހިންމު ކުޅުންތެރިން ކަމަށެވެ.
ކުވެއިތުން ވަނީ އެ ޓީމު ކުޅުނު ފުރަތަމަ މެޗުގައި ނޭޕާލް އަތުން 3-1 ގެ ނަތީޖާއަކުން މޮޅުވެފައެވެ. އަދި ދެވަނަ މެޗުގައި ޕާކިސްތާން އަތުން 4-0 ގެ ނަތީޖާއަކުން މޮޅުވެފައެވެ. އެއާއެކު ގްރޫޕް އޭގެ އެއްވަނައިގައި އޮތް ކުވެއިތާއި ދެވަނައިގައި އޮތް އިންޑިއާއަށް ދެ މެޗުން ހަ ޕޮއިންޓް ވަނީ ލިބިފައެވެ. އަދި މި ދެ ޓީމަށް ސެމީ ފައިނަލުގެ ޖާގަ ވަނީ ކަށަވަރުވެފައެވެ.