ޖޯޖިއާގައި މިހާރު ކުރިއަށްދާ 20 އަހަރުން ދަށުގެ ޔޫރޯ ޗެމްޕިއަންޝިޕުގެ ގްރޫޕް ސީގައި އިސްރާއީލް ބަލިކޮށް ކުއާޓާ ފައިނަލުން އިންގްލަންޑް ޖާގަ ހޯދައިފިއެވެ.
ރަމާޒް ޝެންގޭލިއާ ސްޓޭޑިއަމްގައި ކުޅުނު މި މެޗު އިންގްލޭންޑުން ކާމިޔާބުކުރީ 2 ލަނޑު ސުންލަނޑުންނެވެ.
އިންގްލޭންޑްގެ ފަރާތުން މޮޅު ކުޅުމެއް ފެނިގެންދިޔަ މިމެޗްގައި ގިނައިރު ބޯޅަ ގެންގުޅެ ގިނަ ހަމަލާ އުފައްދާފައިވަނީވެސް އިންގްލޭންޑްއިންނެވެ. މިގޮތުން އުފެއްދި ހަމަލާއެއްގައި މެޗްގެ 15 ވަނަ މިނެޓްގައި އިންގްލޭންޑުން ވަނީ މެޗްގެ ލީޑު ވެސް ނަގާފައެވެ. މިލަނޑު އެޓީމަށް ޖަހާދިނީ އެންތަނީ ގޯޑަންއެވެ. އަދި އެޓީމްގެ ދެވަނަ ލަނޑު މެޗްގެ 68 ވަނަ މިނެޓްގައި ޖަހާދިނީ އެމީލް ސްމިތު ރޯއެވެ. މިމެޗްގައި އިސްރާއީލުން ލަނޑެއް ޖެހޭތޯ މަސައްކަތް ކުރި ނަމަވެސް އެކަން އެޓީމަށް ކާމިޔާބުވާގޮތެއް ނުވިއެވެ.
މި ކާމިޔާބީއާއެކު އިންގްލޭންޑް މިހާރުވަނީ ގްރޫޕް ސީގައި ކުޅުނު ދެ މެޗްވެސް ކާމިޔާބުކޮށްފައެވެ. އަދި މިއާއެކު މިގްރޫޕްގެ އެއްވަނަ ލިބޭނެކަން މިހާރުވަނީ ޔަޤީންވެގެން ގޮސްފައެވެ. އެހެންކަމުން ކްއާޓަރ ފައިނަލްގައި އިންގްލޭންޑް ބައްދަލުކުރަން ޖެހޭނީ ގްރޫޕް އޭގެ ދެވަނަ ޓީމާއެވެ.
ގްރޫޕް ސީގައި ރޭ ކުޅުނު ދެވަނަ މެޗްގައި ޖަރުމަނުވިލާތާއި ޗެކްރިޕަބްލިކް ބައްދަލުކުރި މެޗް 2 ލަނޑު އެއްލަނޑުން ކާމިޔާބުކުރީ ޗެކްރިޕަބްލިކްގެ ޓީމެވެ. އެހެންކަމުން އެންމެ ފަހުގެ ޗެމްޕިއަން ޖަރުމަނުވިލާތަށް ކުއާޓާފައިނަލަށް ދިއުމަށް އޮތް ފުރުޞަތު މިވަނީ ވަރަށް ބޮޑަށް ހަނިވެގެން ގޮސްފައެވެ.