އަންނަ ސީޒަނުގައި އިނގިރޭސި ޕްރިމިއަރ ލީގު ކާމިޔާބުކުރަން ބޭނުންނަމަ އައު ކުޅުންތެރިންގެ ސޮއި ހޯދައި، ޓީމު ވަރުގަދަކުރަން ޖެހޭކަމަށް އާސެނަލުގެ ކޯޗް މިކޭލް އާޓޭޓާ ބުނެފިއެވެ.
މިދިޔަ ސީޒަންގައި ބޮޑު ބައިގައި ލީގުގެ އެއްވަނައިގައި އޮތުމާއެކުވެސް ފަހު ވަގުތު އާސެނަލްއަށް ވަނީ މެންޗެސްޓަރ ސިޓީ ކައިރީ ހިފަހައްޓަލާލެވޭގޮތް ނުވެފައެވެ. އާޓޭޓާ ހާމަކުރާގޮތުގައި މިއަންނަ ސީޒަން ވެގެންދާނީ މިހާތަނަށް ފެނިގެންދާނެ އެންމެ ވާދަވެރި ސީޒަނަށް ކަމަށެވެ.
ނިމިދިޔަ ސީޒަންވެސް އާޓޭޓާ ސިފަކުރިގޮތުގައި ވަރަށް ވާދަވެރި ކަމަށާއި، ނަމަވެސް އަންނަ ސީޒަންގައި އެއަށްވުރެވެސް ވާދަވެރިކަން ބޮޑުވެގެންދާނެ ކަމަށެވެ. މީގެ އެންމެ ބޮޑު އެއް ސަބަބެއް ކަމުގައި އާޓޭޓާ ފާހަގަކުރީ ލީގުގައި ފެންވަރު ރަނގަޅު މޮޅެތި ކޯޗުންނާއި ކުޅުންތެރިން ގިނަވެ ޓީމްތަކުގެ މެދުގައި އޮތް ވާދަވެރިކަން ކުރިއަށްވުރެވެސް ބޮޑުވެފައިވުމެވެ. އެހެންކަމުން އަންނަ ސީޒަންގައި ލީގު ކާމިޔާބުކުރަން ބޭނުންނަމަ ޓީމް ވަރުގަދަކުރަން މަޖުބޫރު ކަމަށް ކޯޗު ބުންޏެވެ.
އާޓޭޓާ ހާމަކުރިގޮތުގައި މިދިޔަ ސީޒަން ދިޔަގޮތުން ލީގު ކާމިޔާބު ނުކުރެވުމުގެ ހިތްދަތިކަން އަދިވެސް އެބަހުރި ކަމަށެވެ. އަދި ލީގުގެ ދެވަނައަށް ގޮސް ޗެމްޕިއަންސް ލީގުން ޖާގަ ލިބުނު ކަމުގައިވީނަމަވެސް އެ ހިތްދަތިކަން ފިލައިނުދާ ކަމަށް އާޓޭޓާ ހާމަކުރެއެވެ. އާޓޭޓާ ސިފަކުރިގޮތުގައި މިދިޔަ ސީޒަންގައި އެކަން އެހެން ދިމާވީ މުހިންމު ދެތިން ކުޅުންތެރިއަކަށް އަނިޔާވި ހިސާބުން ކަމަށެވެ. އޭގެކުރިން ހުރިހާ ކުޅުންތެރިން ފިޓްކޮށް ތިބިއިރު އެއްވެސް މައްސަލައެއް ކުރިމަތިނުވާކަންވެސް އޭނާ ފާހަގަކުރިއެވެ.