ޖެމެއިކާގެ ޒުވާން ކުޅުންތެރިއެއް ކަމަށްވާ ޑުޖޫން ރިޗަޑްސްގެ ސޮއި އިނގިރޭސި ޕްރިމިއަރ ލީގުގެ ޗެލްސީން ހޯދައިފިއެވެ.
މައުލޫމާތު ލިބިފައިވާގޮތުގައި ރިޗަޑްސް މިހާރު ޗެލްސީއަށް ސޮއިކުރި ނަމަވެސް އޭނާ އެޓީމާއި ގުޅޭނީ މިއަހަރުގެ އޮކްޓޯބަރު މަހު އޭނާއަށް 18 އަހަރު ފުރުމުންނެވެ.
ރިޗަޑްސް މިވަގުތު ކުޅެމުންދަނީ ޖެމެއިކާގެ ކިންގްސްޓަންގައި ހުންނަ ފީނިކްސް އޯލް ސްޓާ އެކެޑެމީއަށެވެ. ރިޗަޑްސްވަނީ ޖެމެއިކާގެ ސީނިއަރ ޤައުމީ ޓީމަށް މިއަހަރުގެ މާރޗް މަހު ކުޅެން ފަށާފައެވެ. މިގޮތުން އޭނާ އެންމެ ފުރަތަމަ ކުޅެފައިވަނީ ޓްރިނިޑާޑް އެންޑް ޓޮބާގޯ އާއި ދެކޮޅަށް ކުޅުނު މެޗެއްގައެވެ. އަދި މިމަހު ގަތަރާއި ދެކޮޅަށް ޖެމެއިކާ ކުޅުނު މެޗްގައިވެސް އޭނާވަނީ ކުޅެފައެވެ.
މީގެއިތުރުން ކޮންކާކަފް ގޯލްޑް ކަޕްގައި ވާދަކުރާ ޖެމެއިކާ ޓީމްގައިވެސް ރިޗަޑްސް ވަނީ އެޤައުމުން ހިމަނާފައެވެ. އަދި މިމުބާރާތުގެ ގްރޫޕް އޭގައި ޖެމެއިކާ ކުޅޭ ފުރަތަމަ މެޗްގައި ބައްދަލުކުރާނީ އެމެރިކާ އާ ދެކޮޅަށެވެ.