ރަޝިޔާގެ ދެކުނުގެ ސަރަޙައްދުތަކަށް އަރައި އަސްކަރީ ބަޣާވާތެއް ކުރަން ފެށި އެ ޤައުމުގެ ކުލީ ސިފައިންގެ ކުންފުނި – ވެގްނަރ ގުރޫޕުން އަތްގަދަކުރި ސަރަޙައްދުތައް ދޫކޮށް ފައިބަން ފަށައިފިއެވެ. ވެގްނަރގެ ކުލީ ސިފައިން ރަޝިޔާ ސަރުކާރާ ދެކޮޅަށް ފެށި އަސްކަރީ ބަޣާވާތް ހުއްޓައިލާފައިވާ ކަމަށް ރިޕޯޓުކޮށްފައި މި ވަނީ ބަޣާވާތް ފެށިތާ 24 ގަޑިއިރު ފަހުންނެވެ.
ރަޝިޔާގެ ދެކުނުގެ ސަރަޙައްދަށް އަރައި ވެގްނަރ ގުރޫޕުން ވަނީ އެ ސަރަޙައްދުގައި އޮންނަ ދެ ރަށެއް ކަމުގައިވާ ރަސްތޮފް-ނަ-ދަނޯއާއި ވަރޯޝިނަށް އަތްގަދަކޮށްފައެވެ. އަދި، އެ ދެ ރަށުގައިވާ އަސްކަރީ މަރުކަޒުތައް އެ ގުރޫޕުގެ ބާރުގެ ދަށަށް ގެންގޮސްފައެވެ. އެ ގުރޫޕުގެ ބާނީ އަދި އިސްވެރިޔާ ޔެވްގެނީ ޕްރިގޮޜިން ބުނީ ބަޣާވާތް ހުއްޓައިލާފައި ވަނީ ލޭއޮހޮރުވުންތަކަށް ފުރުޞަތު ނުދިނުމުގެ ގޮތުން ކަމުގައެވެ.
އޭނާގެ ފައުޖުތަކުން މިހާރު ވަނީ ބެލަރުސްއަށް ދަތުރު ފަށާފައެވެ. ބަޣާވާތް ހުއްޓައިލާފައި ވަނީ އޭނާއާއި ވެގްނަރގެ ކުލީ ސިފައިންނާ ދެކޮޅަށް ރަޝިޔާ ސަރުކާރުން އުފުލާފައިވާ ދަޢުވާތައް ހުއްޓައިލަން އެއްބަސްވުމުން ކަމަށް ރިޕޯޓުތައް ބުނެއެވެ. ރަސްތޮފާއި ވަރޯނިޝަށް އަތްގަދަކުރުމަށް ފަހު ވެގްނަރގެ ކުލީ ސިފައިން ވަނީ ވެރިރަށް މޮސްކޯއާ ދިމާލަށް ވެސް ދަތުރު ފަށާފައެވެ.
ވެގްނަރ ގުރޫޕަކީ ޔޫކްރެއިންގައި ރަޝިޔާއިން ކުރަމުންދާ ހަނގުރާމައިގައި އެންމެ އިސް ދައުރެއް އަދާކުރަމުންދާ ކުލީ ސިފައިންގެ ގުރޫޕެކެވެ. ޔޫކްރެއިންގެ ދެކުނުގައިވާ ބަޚްމުތް ހިފުމަށް ކުރި 10 މަހަށްވުރެ ގިނަ ދުވަސްވީ ހަނގުރާމައިގެ އެންމެ ކުރީ ސަފުގައި ހަރަކާތްތެރިވެފައި ވަނީ އެ ގުރޫޕުގެ ކުލީ ސިފައިންނެވެ.
އެ ރަށް ހިފުމަށް ކުރި ހަނގުރާމައިގެ ތެރެއިން ޕްރިގޮޜިންއާއި ރަޝިޔާގެ އަސްކަރިއްޔާގެ އިސްވެރިންނާ ދެމެދު ޚިޔާލުތަފާތުވުންތައް އުފެދި، ކޯޅުންގަނޑެއް އުފެދުނެވެ. އެންމެ ބޮޑަށް މައްސަލަ ޖެހިފައި ވަނީ، އެ ގުރޫޕުގެ ކުލީ ސިފައިންނަށް ބޭނުންވާ ހަތިޔާރާއި އެހެނިހެން އަސްކަރީ ސާމާނު ފޯރުކޮށްދިނުމުގައި ރަޝިޔާގެ ދިފާޢީ ވުޒާރާއާއި އަސްކަރިއްޔާއިން ފަރުވާކުޑަ ކުރުމެވެ.
ޔޫކްރެއިންގައި ތިބި ވެގްނަރގެ 25,000 އަށްވުރެ ގިނަ ވެގްނަރގެ ސިފައިން ރަޝިޔާގެ ދެކުނަށް އަރާފައި ވަނީ، އެ ގުރޫޕުގެ މަރުކަޒަކަށް ރަޝިޔާގެ އަސްކަރިއްޔާއިން ވައިގެ ޙަމަލާތަކެއްދީ، ގިނަ ޢަދަދެއްގެ ކުލީ ސިފައިން މަރާލުމުގެ ތުހުމަތު ކުރުމަށް ފަހުއެވެ. ރަސްތޮފާއި ވަރޯނިޝަށް އަތްގަދަ ކުރުމަށް ފަހު ވެރިރަށް މޮސްކޯ ހިފުމަށް ވެގްނަރއިން ދަތުރު ފެށުމުން، މޮސްކޯގައި ސަލާމަތީ ފިޔަވަޅުތައް ވަނީ ވަރުގަދަ ކޮށްފައެވެ.
ރަޝިޔާގެ އަސްކަރިއްޔާއާއި ރައީސް ވްލަޑިމިޔަރ ޕުޓިންގެ ސަރުކާރާ ދެކޮޅަށް ޕްރިގޮޜިން ހަނގުރާމަ އިޢުލާނު ކުރުމާ ގުޅިގެން، ޕުޓިންއަށް ވަފާތެރި ޗެޗްނިޔާގެ ސިފައިން ވެސް ވަނީ، ވެގްނަރއާ ދެކޮޅަށް ހަނގުރާމަ އިޢުލާނުކޮށް، ރަޝިޔާގެ ދެކުނުގައި ސަރަޙައްދުތަކަށް ދަތުރު ފަށާފައެވެ. ޕްރިގޮޜިންއާއި އޭނާގެ ކުލީ ސިފައިންނަކީ ޣައްދާރުންގެ ގޮތުގައި ޕުޓިން ސިފަކުރެއްވިއެވެ.
ނަމަވެސް، މަސްރަޙު ފިނިކޮށްފައި މި ވަނީ ބެލަރުސްގެ ރައީސް އެލެންޒެންޑަރ ލުކަޝެންކޯ މެދުވެރިއެއްގެ ގޮތުގައި އަދާކުރެއްވި މަސައްކަތުންނެވެ. އޭނާ ވަނީ ޕްރިގޮޜިންއާ ބައްދަލުކޮށް، މަޝްވަރާތައް ބާއްވަވާފައެވެ. ޕްރިގޮޜިންގެ ފައުޖުތައް ރަސްތޮފާއި ވަރޯނިޝުން ފައިބަން ފަށާފައި ވަނީ ލުކަޝެންކޯއާ އެކު ބޭއްވި މަޝްވަރާތަކަށް ފަހުއެވެ.
މި ކަމާ ގުޅޭ ގޮތުން ވާހަކަފުޅު ދައްކަވަމުން ޔޫކްރެއިންގެ ރައީސް ވޮލޮޑޮމީރް ޒެލެންސްކީ ވިދާޅުވީ ރަޝިޔާގެ ދާޚިލީ ހާލަތު އޮތީ ވަރަށް ނުބައި ފައްތަރެއްގެ ތެރޭގައި ކަމުގައެވެ. އަދި، ޕްރިގޮޜިންގެ ފައުޖުތަށް ބަޣާވާތްކުރަން ފެށުމުން ޕުޓިން ފިއްލަވާފައިވާ ކަމަށް އޭނާ ތުހުމަތު ކުރެއްވިއެވެ. އަދި، ޕުޓިން މި ވަގުތު ރަޝިޔާ ދޫކުރައްވައި ފިއްލަވައިގެން ވަޑައިގަންނަވާފައިވާ ކަމަށް ބެލެވޭ ކަމުގައި ވެސް އޭނާ ވިދާޅުވިއެވެ.
މޮސްކޯ ދޫކުރައްވައި ޕުޓިން ފިއްލަވާފައިވާ ކަމުގެ ރިޕޯޓުތައް އެ ޤައުމުގައި ފެތުރުނެވެ. ނަމަވެސް، ރިޔާސީ ގަނޑުވަރު – ކްރެމްލިންގެ ތަރުޖަމާނު ޑްމިތްރީ ޕެސްކޮފް ވިދާޅުވީ ޕުޓިން އަދިވެސް ކްރެމްލިންގައި ހުންނެވި ކަމުގައެވެ. އަދި، ރަޝިޔާއާ ދެކޮޅަށް ބަޣާވާތް ކުރަން ފެށި ނަމަވެސް، ޕްރިގޮޜިންއާ ދެކޮޅަށް އެއްވެސް ދަޢުވާއެއް ނުއުފުލާނެ ކަމުގައި އޭނާ ވިދާޅުވިއެވެ. އަދި، ރަޝިޔާގެ އަސްކަރިއްޔާއާ ގުޅުމުގެ ފުރުޞަތު ވެގްނަރގެ ކުލީ ސިފައިންނަށް ހުޅުވައިލާފައިވާ ކަމުގައި ވެސް އޭނާ ވިދާޅުވިއެވެ.