އާޖެންޓީނާގެ ޤައުމީ ޓީމަށް ކުޅުނު މެކްސީ ރޮޑްރިގޭޒް، ފުޓްބޯޅަ ކުޅުން ހުއްޓާލުން ފާހަގަކުރުމުގެ ގޮތުން ބޭއްވި ފެއާވެލް މެޗުގައި ލިއޮނެލް މެސީ ހެޓްރިކެއް ހަދައިފިއެވެ.
މެސީ އެ ރަށަކަށް ނިސްބަތްވާ ރޮސާރިއޯގައި ކުޅުނު މިމެޗްގައި ވާދަކުރީ އާޖެންޓީނާ ޤައުމީ ޓީމާއި ނިއުވެލްސް އޯލްޑް ބޯއިސްއެވެ.
މާސެއްލޯ ބިއެލްސާ ސްޓޭޑިއަމްގައި ކުޅުނު މިމެޗުގައި މެސީ ޖެހި ތިންލަނޑުވެސް ޖަހާފައިވަނީ މެޗްގެ ފުރަތަމަ ހާފްގައެވެ. އަދި މިމެޗް ކުޅެފައި މިވަނީ މެސީގެ 36 ވަނަ އުފަންދުވަހު ކަމުން ކުޅިބަލަން ވަން އެންމެ ވަނީ އޭނާއަށް އުފަންދުވަހުގެ ތަހުނިޔާވެސް ކިޔާފައެވެ.
މެޗަށްފަހު ވާހަކަ ދައްކަމުން މެސީ ވަނީ އޭނާގެ އުފަން ދުވަހު އަމިއްލަ ރަށުގައި ކުޅިބެލުންތެރިންނާއެކު ހޭދަކޮށްލަން ލިބުމުން ހާއްސަ އުފަލެއް ލިބިގެން ގޮސްފިކަމަށެވެ. އުމުރުން 42 އަހަރުގައި މެކްސީ ރޮޑްރިގޭޒް ކުޅުން ހުއްޓާލާއިރު އޭނާ މިހާރު ކުޅެމުންދަނީ މެސީ ކުޑައިރު ކުޅުނު ނިއުވެލްސް އޯލްޑް ބޯއިސް އަށެވެ. އޭނާވަނީ ޔޫރަޕްގައި 2002 އިން 2012 އަށް ކުޅެފައެވެ.
މިގޮތުން އެޓްލެޓިކޯ މެޑްރިޑާއި ލިވަޕޫލަށް އޭނާ ކުޅެފައިވެއެވެ. އަދި އެއަށްފަހު އޭނާވަނީ އެނބުރި އާޖެންޓީނާއަށް ކުޅުން ބަދަލުކޮށްފައެވެ. މިމެޗްގައި މެސީގެ އިތުރުން އާޖެންޓީނާގެ ޤައުމީ ޓީމަށް އެހާރާއި މިހާރު ކުޅެފައިވާ ގިނަ ތަރިންނާއި ކޯޗުން ބައިވެރިވިއެވެ.