އިޓާލިއަން ލީގުގެ އޭސީ މިލާނަށް ކުޅެމުން އަންނަ އިޓަލީގެ ސަންޑްރޯ ޓޮނާލީ، އިނގިރޭސި ޕްރިމިއަރ ލީގުގެ ނިއުކާސަލް ޔުނައިޓެޑަށް ބަދަލުވުމަކީ އޭނާއަށް ފައިދާކުރާނެ ނިންމުމެއް ކަމަށް އިޓަލީ ޤައުމީ ޓީމުގެ ކޯޗު ރޮބާޓޯ މަންޗީނީ ބުނެފިއެވެ.
މަންޗީނީ ހާމަކުރިގޮތުގައި ޓޮނާލީއަށް ޕްރިމިއަރ ލީގުގައި ކުޅެން ލިބުމުން އޭނާގެ ކުޅުމުގެ ފެންވަރު ރަނގަޅު ވުމަށް އެހީތެރިވެގން ދާނެ ކަމަށެވެ. އަދި އެހެން ކަމުން މިއީ އޭނާއަށް ރަނގަޅު ނިންމުމެއް ކަމަށެވެ. އެހެން ނަމަވެސް މިއީ ސެރީއާއަށް އެހާ ރަނގަޅު ނިންމުމެއް ނޫންކަމަށްވެސް އޭނާ ފާހަަ ކުރިއެވެ. އެއީ ޓޮނާލީ ފަދަ ހުނަރުވެރި ޒުވާޏް ކުޅުންތެރިން ސެރީއާ ދޫކޮށް ދިއުމަކީ އެލީގުގައި މައްސަލަ ތަކެއް ހުރިކަން ހާމަކޮށްދޭ ކަމެއް ކަމަށެވެ. މަންޗީނީގެ އިތުރުން އިޓަލީގެ އިތުރުނ އޭސީ މިލާންގެ ކުރީގެ ތަރި ފިލީޕޯ އިންޒާގީވަނީ ޓޮނާލީ މިލާން ދުކޮށް ދާތީ ދެރަވާކަން ހާމަކޮށްފައެވެ.
މައުލޫމާތުލިބިފައިވާގޮތުގައި ޓޮނާލީ ނިއުކާސްލް ބަދަލުވުމުގެ ކަންތައް މިހާރުވަނީ ގާތްގަނޑަކަށް ނިމިފައެވެ. މިހާރު އުޅޭނީ އެންމެ ފަހު މަރްހަލާގެ ތެރޭގައެވެ. އުމުރުން 23 އަހަރުގެ މިކުޅުންތެރިޔާގެ ވިޔަފާރި 80 މިލިއަން ޔޫރޯއަށް އަރާނެކަމަށް ވަނީ ބެލެވިފައެވެ.
ޓޮނާލީގެ އެޖެންޓް ގުއިސެއްޕޭ ރީސޯ ހާމަކުރުގޮތުގައި ނިއުކާސްލް ކަހަލަ ޓީމަކުން މިފަދަ އޮފަރއެއް އައުމުން ކްލަބުންވެސް އަދި ކުޅުންތެރިޔާވެސް ދޫކޮށްލަން ބޭނުން ނުވި ކަމަށެވެ. މިގޮތުން އަމިއްލަ ކަންތައްތަކާއި ގުޅޭގޮތުން ޓޮނާލީ އާއި ނިއުކާސްލްގެ މެދުގައިއެއްބަސްވެވުމަކަށް އާދެވިފައިވާ ކަމަށާއި މިހާރު ނިންމަން ހުރީ ދެ ކްލަބްގެ ދެމެދުގައި ހިނގަންޖެހޭ ބައެއް ކަންތައްތައް ކަމަށެވެ. ޓޮނާލީ މިވަގުތު ދަނީ އިޓަލީވިލާތުގެ 21 އަހަރުން ދަށުގެ ޓީމާއެކު ޔޫރަޕިއަން ޗެމްޕިއަންޝިޕްގައި ވާދަކުރަމުންނެވެ.