ސާފް ބަންގަބަންދު ޗެމްޕިއަންޝިޕް 2023 ގެ ގްރޫޕް އޭގައި ނޭޕާލުން ކުޅުނު ދެވަނަ މެޗުން އިންޑިއާ އަތުން ބަލިވުމުގެ ޒިންމާ ފުރިހަމައަށް ނަގާ ކަމަށް އެ ޓީމުގެ ކޯޗު ވިންޗެންޒޯ އަލްބާޓޯ ބުނެފިއެވެ.
ގްރޫޕް އޭގައި ނޭޕާލުން ކުޅުނު ފުރަތަމަ މެޗުގައި ކުވެއިތު އަތުން ވަނީ 3-1 ގެ ނަތީޖާއަކުން ބަލިވެފައެވެ. އަދި ދެވަނަ މެޗުން އިންޑިއާ އަތުން ބަލިވީ 2-0 ގެ ނަތީޖާއަކުންނެވެ. މި ނަތީޖާތަކާއެކު ނޭޕާލް ވަނީ މުބާރާތުން ކަޓާފައެވެ.
އިންޑިިއާ މެޗަށްފަހު އޮތް ނޫސްވެރިންގެ ބައްދަލުވުމުގައި ވާހަކަ ދައްކަމުން ކޯޗު އަލްބާޓޯ ބުނީ މި މެޗުން ބަލިވުމުގެ ޒިންމާ އޭނާ ފުރިހަމައަށް ނަގާ ކަމަށެވެ. އަދި މި މުބާރާތުގައި ނޭޕާލުން މިހާތަނަށް ކުޅުނު ދެ މެޗުން ބަލިވި ނަމަވެސް އޭނާ ޓީމުން ދެއްކި ކުޅުމާމެދު ހިތްހަމަ ޖެހޭ ކަމަށްވެސް ބުންޏެވެ.
އަލްބާޓޯ ބުނީ މި މެޗުން ފެނިގެންދިޔައީ އޭނާގެ ޓީމާއި އިންޑިއާ ޓީމާ ހުރި ތަފާތު ކަމަށާއި، ނޭޕާލް ޓީމުގައި ތިބި ކުޅުންތެރިންގެ ތަޖުރިބާ މި ފެންވަރުގެ މެޗުތަކަށް މަދުވިކަން މި މެޗުން ފެންނާނެ ކަމަށެވެ.
ނޫސްވެރިންގެ މި ބައްދަލުވުމުގައި ވާހަކަ ދައްކަމުން އިންޑިއާގެ އެސިސްޓަންޓް ކޯޗު މަހޭޝް ގައުލީ ބުނީ އިންޑިއާއިން މި މެޗަށް ނުކުތީ މޮޅުވާން ކަމަށާއި އެކަން އެ ޓީމުން ކޮށްފި ކަމަށެވެ.
މަހޭޝް ބުނީ ނޭޕާލްގެ ޑިފެންސް ލައިން ފޫއަޅުވާލަން ފުރަތަމަ ހާފުގައި އުނދަގޫވި ކަމަށެވެ. އަދި މި މެޗަށް އިންޑިއާއިން ނުކުތީ ގިނަ ބަދަލުތަކާއެކު ކަމަށާއި، އެ ބަދަލުތައް ގެނައީ ކުޅުންތެރިންނަށް އަރާމުކުރުމުގެ ފުރުސަތު ދިނުމުގެ ބޭނުމުގައި ކަމަށްވެސް މަހޭޝް ބުންޏެވެ.
މަހޭޝް ބުނީ މިހާރު އިންޑިއާ ޓީމުން ދައްކަމުން އަންނަ ކުޅުމުން އެ ޤައުމުގައި ފުޓްބޯޅަ ކުރިއަރަމުން އަންނަ މިންވަރު ފެންނާނެ ކަމަށެވެ.
މުބާރާތުގެ ގްރޫޕް ސްޓޭޖުގއި އިންޑިއާއިން ދެން ބައްދަލުކުރަން ޖެހޭނީ ކުވެއިތާއެވެ. އެ މެޗުން މި ގްރޫޕްގެ އެއްވަނަ އަދި ދެވަނަ ޓީމު އެނގިގެންދާނެއެވެ.