ބާސާ ދޫކޮށް ބުސްކެޓްސް އިންޓަރ މައޭމީއަށް ސޮއިކޮށްފި

މި ސީޒަނުގައި ބާސެލޯނާއިން ވަކިވި އެ ޓީމުގެ ކެޕްޓަން ސާޖިއޯ ބުސްކެޓްސް، އެމެރިކާގެ މޭޖާ ލީގު ސޮކާގެ އިންޓަރ މައޭމީއަށް ސޮއިކުރިކަން އެ ކުލަބުން ހާމަކޮށްފިއެވެ.

އުމުރުން 34 އަހަރުގެ ބުސްކެޓްސް ވަނީ 18 އަހަރަށްފަހު ބާރސާ މިސީޒަނަށްފަހު ދޫކޮށްލާނެކަން ހާމަކޮށްފައެވެ.

މި ބަދަލާއެކު މިއަންނަ ސީޒަންގައި ބުސްކެޓްސް އޭނާގެ ކުރީގެ ޓީމް މޭޓް، ލިއޮނެލް މެސީ އާއެކު އެއްޓީމަކަށް ކުޅެވޭނެކަން މިވަނީ ޔަގީންވެގެން ގޮސްފައެވެ. މެސީވެސް ވަނީ އިންޓަރ މައޭމީއަށް ސޮއިކުރާނެކަން މިމަހު ހާމަކޮށްފައެވެ.

ބުސްކެޓްސް އާއި މެސީ ވަނީ ބާރސާއަށް 2008 އިން 2021 އާއި ދެމެދު އެކުގައި 13 އަހަރު ކުޅެފައެވެ. މިދެ ކުޅުންތެރިން އެކުގައި ކުޅުނުއިރު ބާސާއިން ވަނީ ޗެމްޕިއަންސް ލިގުގެ ތަށި ތިން ފަހަރު، ލަލީގާގެ ތަށި އަށް ފަހަރު އަދި ކޮޕާ ޑެލްރޭ ގެ ތަށި ހަފަރު ކާމިޔާބުކޮށްފައެވެ. ބުސްކެޓްސް ވަނީ އޭނާ ބާރސާގައި ހޭދަކުރި ދިގު މުއްދަތުގައި އެކްލަބަށް 722 މެޗް ކުޅެދީފައެވެ. އަދި 18 ލަނޑު ޖަހާދީ 40 އެސިސްޓްވެސް ކޮށްފައިވެއެވެ.

ބުސްކެޓްސް ގެންދިއުމަށް ސައުދީ ޕްރޯ ލީގުގެ ޓީމްތަކުންވެސް ވަރަށް މަސައްކަތް ކޮށްފައިވާކަމަށް ޚަބަރުތައް ބުނެއެވެ. ނަމަވެސް އޭނާ ނިންމީ އިންގްލަންޑްގެ ކުރީގެ ކެޕްޓަން ޑޭވިޑް ބެކަމްގެ އިންޓަރ މައޭމީއަށް ސޮއިކުރާށެވެ. ބުސްކެޓްސް ވަނީ އެންމެފަހުން ބޭއްވި ވާރލްޑް ކަޕަށްފަހު ސްޕެއިން ޤައުމީ ޓީމަށް ކުޅުން ހުއްޓާލާފައެވެ.