ސެލްޓަ ވީގޯގެ އައު ކޯޗަކަށް ރަފައެލް ބެނީޓޭޒް ހަމަޖައްސައިފި

ސްޕެނިޝް ލީގުގެ ސެލްޓަ ވީގޯގެ އައު ކޯޗަކަށް ސްޕެއިންގެ ތަޖުރިބާކާރު ކޯޗު ރަފައެލް ބެނީޓޭޒް ހަމަޖައްސައިފިއެވެ.

އުމުރުން 63 އަހަރުގެ ބެނީޓޭޒް ސެލްޓާއަށް ސޮއިކޮށްފައިވަނީ ތިން އަހަރު ދުވަހުގެ އެއްބަސްވުމެއްގެ ދަށުންނެވެ. ބެނީޓޭޒް އެންމެ ފަހުން ކޯޗް ކޮށްދީފައިވަނީ އިންގްލިޝް ޕްރިމިއަރ ލީގުގެ އެވަޓަން އަށެވެ. އަދި 2022 ވަނަ އަހަރުގެ ޖެނުއަރީ މަހު އެކްލަބުން އޭނާ ވަކިކުރި ފަހުން އެހެން ކްލަބަކަށް ކޯޗް ކޮށްދީފައެއް ނުވެއެވެ.

ސެލްޓާގެ ކުރީގެ ކޯޗް ކާލޯސް ކާވަހާލްވަނީ އެޓީމް ރެލިގޭޝަނުން މިދިޔަ ސީޒަންގައި ސަލާމަތްކޮށްދިނުމަށްފަހު ކްލަބް ދޫކޮށްލާފައެވެ. ސެލްޓަވީގޯ މިދިޔަ ސީޒަން ނިންމާލީ ލީގުގެ 13 ވަނައިގައި އޮވެގެންނެވެ. ނަމަވެސް އެޓީމަށް ލަލީގާގައި އޮވެވޭކަން ޔަގީންވެގެންދިޔައީ ފަހު މެޗްގައި މިފަހަރުގެ ޗެމްޕިއަން އެފްސީ ބާސެލޯނާ ބަލިކުރުމުންނެވެ.

ބެނީޓޭޒް ވަނީ އޭނާގެ ކޯޗިންގ ކެރިއަރުގައި މިހާތަނަށް ސްޕެއިން، އިޓަލީވިލާތް، އިންގްލަންޑް އަދި ޗައިނާގެ 14 ކްލަބަކަށް ކޯޗް ކޮށްދީފައެވެ. މިގޮތުން ކޯޗް ކޮށްދީފައިވާ ބައެއް ކަލަބްތަކުގެތެރޭގައި ރެއާލް މެޑްރިޑް، އިންޓަރ މިލާން، ނަޕޯލީ، ލިވަޕޫލް، ނިއުކާސްލް ޔުނައިޓެޑް، ޗެލްސީ އަދި އެވަޓަން ހިމެނެއެވެ. އޭނާ ހޯދާފައިވާ ކާމިޔާބީ ތަކުގެ ތެރޭގައި 2005 ވަނަ އަހަރު ޗެމްޕިއަންސް ލީގާއި 2006 ވަނަ އަހަރުގެ އެފް އޭ ކަޕް ލިވަޕޫލާއެކު ހޯދުމާއި 2013 ވަނަ އަހަރު ޗެލްސީ އާއެކު ޔޫރޮޕާ ލީގު ހޯދުން ހިމެނެއެވެ.