މެޗުތަކެއް ނުކުޅެ ސާފް ޗެމްޕިއަންޝިޕަށް ނުކުތުމުން އެކަމުގެ އަސަރު ޓީމުން ފެނިގެންދިޔަ ކަމަށް ގައުމީ ފުޓުބޯޅަ ޓީމުގެ ކޯޗު ފްރެންޗެސްކޯ މޮރިއޭރޯ ބުނެފިއެވެ.
އިންޑިއާގެ ބެންގަލޫރުގައި މިހާރު ކުރިއަށްދާ ސާފް ޗެމްޕިއަންޝިޕް ފުޓުބޯޅަ މުބާރާތުގެ ފުރަތަމަ މެޗުގައި ރާއްޖެއިން ވަނީ 2-0 ގެ ނަތީޖާއަކުން ބޫޓާން ބަލިކޮށްފައެވެ.
މެޗަށްފަހު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަމުން މޮރިއޭރޯ ބުނީ މި މެޗުގައި ރާއްޖޭގެ ޓީމުގެ ފަރާތުން ފެނުނު ކުޅުމާއި މެދު ހިތްހަމަނުޖެހޭ ކަމަށެވެ. މޮރިއޭރޯ ބުނީ ރާއްޖެއިން ރަސްމީ ފުޓުބޯޅަ މެޗެއް ނުކުޅެ މާ ގިނަދުވަސްވެއްޖެ ކަމަށާއި، ބޫޓާން މެޗުގައި ގިނަ ގޯސްތަކެއް ފެނިގެންދިޔަ ކަމަށެވެ.
މޮރިއޭރޯ އިތުރަށް ބުނީ ސާފް ޗެމްޕިއަންޝިޕަށް އަންނައިރު، ރާއްޖެއަކީ ވަރުގަދަ ޓީމެއްގެ ގޮތުގައި ލޭބަލްވެފައި އޮންނާތީ އެއީ ކުޅުންތެރިން އަދި އޭނާއަށްވެސް އޮތް ޕްރެޝަރެއް ކަމަށެވެ. އަދި މުބާރާތަށް ޓީމުތަކުން އަންނަނީ ރަނގަޅަށް ތައްޔާރުވެގެން ކަމަށާއި، އެކަން މުބާރާތުގައި މިހާތަނަށް ޓީމުތަކުން ކުޅުނު މެޗުތަކުން ފެންނަ ކަމަށެވެ.
މި މެޗުގައި ރާއްޖޭގެ ހަސަން ރާއިފް އަޙްމަދު (ހަންނަ)އަށް ދެއްކި ރަތްކާޑަކީ ހަންނަގެ ތަޖުރިބާ މަދުވުމުން ލިބުނު ކާޑެއް ކަމަށް މޮރިއޭރޯ ބުންޏެވެ. އަދި ހަންނަ ކުރިއަށް އޮތް މެޗަށް ސަސްޕެންޑްވި ނަމަވެސް ރާއްޖޭގެ އެޓޭކިން ކުޅުންތެރިން އެބަތިބި ކަމަށް މޮރިއޭރޯ ބުންޏެވެ.
މި ނޫސްވެރިންގެ ބައްދަލުވުމުގައި ވާހަކަދައްކަމުން ބޫޓާންގެ ކޯޗު ޗިކީ ވަންގްމޯ ބުނީ ބޫޓާން ޓީމުން ފެނުނު ކުޅުމާއި މެދު ހިތްހަމަޖެހޭ ކަމަށެވެ. އަދި ރާއްޖެ ކަހަލަ ޓީމަކާ ދެކޮޅަށް ބޫޓާންގެ ކުޅުންތެރިން ދެއްކި ކުޅުމަށް ތައުރީފު ހައްގު ކަމަށް ވަންގްމޯ ބުންޏެވެ.
ވަންގްމޯ ބުނީ ބޫޓާން ޓީމަކީ ޒުވާން ޓީމެއް ކަމަށާއި، ހާއްސަކޮށް އެ ޓީމުގައި ހިމެނޭ ގިނަ ކުޅުންތެރިންނަކީ ކިޔަވަމުން އަންނަ ކުޅުންތެރިން ކަމަށެވެ.
މި މުބާރާތުގައި ރާއްޖެއަށް ދެވަނަ މެޗުގައި ބައްދަލުކުރަން ޖެހޭނީ ބަންގްލަދޭޝް އާއެވެ. އަދި ބޫޓާނުން ދެވަނަ މެޗުގައި ނުކުންނާނީ ލުބުނާންއާ ދެކޮޅަށެވެ.