އިނގިރޭސި ޕްރިމިއަރ ލީގުގެ ޗެލްސީއަށް ކުޅެމުން އައި ކްރޮއޭޝިއާގެ މިޑްފީލްޑަރ މަޓެއޯ ކޮވަސިޗް ގެންދިއުމާ ގުޅޭގޮތުން ލީގު ޗެމްޕިއަން މެންޗެސްޓާ ސިޓީއަށް އެއްބަސްވުމަކަށް އާދެވިއްޖެއެވެ.
އިނގިރޭސި މީޑިއާތަކުން ހާމަކުރާގޮތުގައި ދެ ކްލަބްގެ މެދުގައިވަނީ 30 މިލިއަން ޕައުންޑްގެ އަގަކަށް އެއްބަސްވެވިފައެވެ.
މިއެއްބަސްވުމުގެ ދަށުން ސިޓީން ފުރަތަމަ ފީއެއްގެގޮތުގައި 25 މިލިއަން ދައްކަން އެއްބަސްވެފައިވާއިރު ސިޓީއަށް މިއަންނަ ސީޒަންގައި ތައްޓެއް ކާމިޔާބު ކުރެވިއްޖެނަމަ ކުޅުންތެރިޔާގެ ކުޅުމަށް ބެލުމެއްނެތި އިތުރު ފަސް މިލިއަން ދިނުމަށްވަނީ އެއްބަސްވެވިފައެވެ.
އުމުރުން 29 އަހަރުގެ ކޮވަސިޗް ޗެލްސީއަށް ބަދަލުވެފައިވަނީ 2019 ވަނަ އަހަރު ސްޕެނިޝް ލަލީގާގެ ރެއާލް މެޑްރިޑުން ލޯން އެއްބަސްވުމެއްގެދަށުންނެވެ. ނަމަވެސް ފަހުން ވަނީ ދާއިމީކޮށް ޗެލްސީއަށް ބަަދަލުވެ ފަސް އަހަރު ދުވަހުގެ އެއްބަސްވުމެއްގައި ސޮއިކޮށްފައެވެ. ކޮވަސިޗް ސިޓީއަށް ދިއުމުން އެޓީމްގެ ކެޕްޓަން އިލްކައި ގުންޑޮގާންގެ މުސްތަގްބަލަށް ވާނެގޮތަކާމެދު މިވަނީ ސުވާލު އުފެދިފައެވެ. ގުންޑޮގާން މިއަންނަ ސީޒަންގައި ކުޅޭނެ ކްލަބެއް އޭނާ އަދިވެސް ނުނިންމައެވެ. ކޮވަސިޗް މިދިޔަ ސީޒަންގައިވަނީ ޗެލްސީއަށް 37 މެޗް ކުޅެދީފައެވެ. އޭނާއަކީ 2021 ވަނަ އަހަރު ސިޓީ ބަލިކޮށް ޗެލްސީން ޗެމްޕިއަންސް ލީގުގެ ތަށި އުފުލާލި ޓީމްގައިވެސް ހިމެނުނު ކުޅުންތެރިއެކެވެ.
ޗެލްސީން އަންނަނީ އެޓީމްގައި ކުޅުންތެރިން މާގިނަވުމުގެ ސަބަބުން ބައެއް ކުޅުންތެރިން ދޫކޮށްލުމުގައި އަވަސް މަސައްކަތްތަކެއް ކުރަމުންނެވެ. އެގޮތުން އެޓީމްގެ އާ ކޯޗް މައުރީސިއޯ ޕޮޗެޓީނޯ ޓީމާއި ހަވާލުވާއިރު އެޓީމްގައި މާގިނަ ކުޅުންތެރިން ތިބުމަށް ޗެލްސީގެ މެނޭޖުމަންޓުން ބޭނުމެއް ނުވެއެވެ.