ގާނާގެ ޤައުމީ ޓީމަށް އެންމެ ގިނަ ލަނޑު ޖަހާދީފައިވާ ތަޖުރިބާކާރު ކުޅުންތެރިޔާ އަސަމޮއާ ޖިއާން، ފުޓްބޯޅަ ކުޅުން ހުއްޓާލިކަން ހާމަކޮށްފިއެވެ.
އޭނާ މިކަން ހާމަކޮށްފައިވަނީ ގާނާގެ ވެރިރަން އަކްރާގައި ބޭއްވި ބޭންކިންގ ކޮންފަރެންސެއްގައި ސްޓޭޖްމަތިގައި ކޯޓެޑިއުއަރގެ ކުރީގެ ތަރި ޑިޑިއަރ ޑްރޮގްބާއާއެކު ހުރެއެވެ.
ސްޓޭޖް މަތީގައި ވާހަކަ ދައްކަން ހުރެފައި ކުއްލިއަކަށް 2018 ވަނަ އަހަރު ފުޓްބޯޅަ ކުޅުން ހުއްޓާލި ޑްރޮގްބާ އާއި ދިމާލަން އެނބުރި ފުޓްބޯޅަ އާއި ދުރަށް ދިއުމުން އޭނާއަށް އިހްސާސްވި އިހްސާސް ކިޔާދިނުމަށް ޖިއާންވަނީ ޑްރޮގްބާ ކައިރިން އެދިފައެވެ.
އެގޮތުން ޑްރޮގްބާ އޭނާއަށް އެކަމުން ކުރެވުނު އިހްސާސް ކިޔާދެމުން ދަނިކޮށް ކުއްލިއަކަށް އޭނާގެ ވާހަކަ މެދުކަނޑާލުމަށްފަހު ޖިއާން ބުނީ އެ އިހްސާސް އޭނާއަށްވެސް ކުރެވޭތާ މިހާރު ދޮޅު އަހަރެއްހާ ދުވަސް ވެއްޖެ ކަމަށެވެ. އަދި މިދިޔަ ދުވަސް ތަކުގައި ބައެއް މީހުން އޭނާ ކައިރީ ފުޓްބޯޅަ ކުޅުން މިހާރު ހުއްޓާލީތޯ އަހާކަމަށްވެސް ޖިއާން ހާމަކުރިއެވެ. އަދި މިވަގުތު އޭނާ ކުޅުން ހުއްޓާލާކަން ހާމަކުރަން ބޭނުން ކަމުގައި ޖިއާން ހާމަކުރިއެވެ. މިއާއެކު އެވާހަކަ އަޑުއަހަން ތިބި މީހުން އިރުކޮޅަކަށް ހަމަހިމޭން ވެގެން ދިޔަ ނަމަވެސް އިރުކޮޅަކުން ކޮޅަށް ތެދުވެ ޖިއާންގެ ނިންމުމަށް ތާއީދުކޮށް އަތްޖެހިއެވެ.
ޖިއާން ކުޅުން ހުއްޓާލާފައިމިވަނީ 20 އަހަރުގެ ދިގު މުއްދަތެއްގައި ކުޅުމަށްފަހުއެވެ. އުމުރުން 37 އަހަރުގެ ޖިއާން ބައިނަލްއަޤްވާމީ މުބާރާތްތަކުގައި ގާނާ ޓީމަށް ކުޅެން ފަށާފައިވަނީ 2003 ވަނަ އަހަރު އުމުރުން 17 އަހަރުގައެވެ. އޭނާ އެންމެ ފުރަތަމަ ކުޅެފައިވަނީ ވާރލްޑް ކަޕް ކޮލިފައިންގ މެޗެއްގައި ސޮމާލިއާ އާއި ދެކޮޅަށެވެ. އަދި އޭނާ އެންމެ ފަހުން ޤައުމީ ޓީމަށް ކުޅެފައިވަނީ 2019 ވަނަ އަހަރުއެވެ. އަދި މި މުއްދަތުގެ ތެރޭގައި އޭނާވަނީ 109 މެޗް ޤައުމީ ޓީމަށް ކުޅެދީ 51 ލަނޑު ޖަހާދީފައެވެ. މިއީ އެޤައުމުގެ ރިކޯޑެކެވެ.
ޖިއާންވަނީ ކްލަބް ލެވެލްގައި 11 ކްލަބަކަށް ކުޅެފައެވެ. މިގޮތުން ކުޅެފައިވާ ޓީމް ތަކުގެ ތެރޭގައި އިޓަލީވިލާތުގެ އުދިނޭސީ އާއި ފަރަންސޭސިވިލާތުގެ ރެން އާއި އިންގްލަންޑްގެ ސަންޑަރލަންޑްގެ އިތުރުން ޔޫއޭއީ، ޗައިނާ، ތުރުކިޔޭ، އިންޑިއާ އަދި ގާނާގެ ކްލަބްތަކަށް ކުޅެފައިވެއެވެ.