ސްޕެނިޝް ލީގުގެ ރެއާލް މެޑްރިޑުގެ މެދުތެރެއަށް ކުޅެމުން އަންނަ ޖަރުމަނުގެ ތަޖުރިބާކާރު ކުޅުންތެރިޔާ ޓޯނީ ކްރޫސް، އެ ކުލަބުގައި އިތުރު އެއް އަހަރު މަޑުކުރަން ނިންމައިފިއެވެ.
މިގޮތުން އައު އެއްބަސްވުން ނިމުމަކަށް އަންނާނީ އަންނަ އަހަރުގެ ޖޫން މަހުގެ 30 ވަނަ ދުވަހުއެވެ. އުމުރުން 33 އަހަރުގެ ކްރޫސްވަނީ މިހާތަނަށް ރެއާލް އަށް 417 މެޗް ކުޅެދީފައެވެ. އަދި މިދިޔަ ސީޒަންގައި އޭނާވަނީ 30 މެޗް ލަލީގާގައި އަދި 12 މެޗް ޗެމްޕިއަންސް ލިގުގައި ކުޅެދީފައެވެ.
2014 ވަނަ އަހަރުގެ ވާރލްޑް ކަޕް ޤައުމީ ޓީމާއެކު ހޯދުމަށްފަހު ރެއާލްއަށް އެއަހަރު ބަދަލުވި ކްރޫސް މިހާތަނަށް ވަނީ އެޓީމާއެކު 20 ތަށި ކާމިޔާބުކޮށްފައެވެ. މިގޮތުން ރެއާލްގައި އޭނާ ހޭދަކުރި 9 އަހަރުގައި އޭނާވަނީ ޗެމްޕިއަންސް ލީގުގެ ތަށި ހަތަރު ފަހަރު، ކްލަބް ވާރލްޑް ކަޕްގެ ތަށި ފަސް ފަހަރު، ޔޫރަޕިއަން ސުޕަރ ކަޕްގެ ތަށި ހަތަރު ފަހަރު، ލަލީގާގެ ތަށި ތިން ފަހަރު، ކޮޕާ ޑެލްރޭގެ ތަށި އެއް ފަހަރު އަދި ސްޕެނިޝް ސުޕަރ ކަޕްގެ ތަށި ތިން ފަހަރު ކާމިޔާބުކޮށްފައެވެ.
މިދިޔަ ސީޒަންގައި އޭނާވަނީ ރެއާލްއަށް ކޮޕާ ޑެލްރޭގެ ތަށި ހޯދުމުގައި މުހިންމު ދައުރެއް އަދާކޮށްދީފައެވެ. ރެއާލް އިން ވަނީ މިއަންނަ ސީޒަންގައި އެޓީމްގެ މެދުތެރެ ވަރުގަދަ ކުރުމަށްޓަކައި އިންގްލަންޑްގެ އަރަމުން އަންނަ ތަރި ޖޫޑް ބެލިންގހަމް ވަރަށް ފަހުން އެޓީމަށް ސޮއިކުރުވާފައެވެ.