ޤައުމީ ބޮޑީބޯޑިން ލީގުގައި ހިމެނޭ މުބާރާތްތަކުގެ ތެރެއިން މާލޭގައި ބޭއްވި ބުރުނު ޝިކާރު ބޮޑީބޯޑިން ޗެލެންޖް 2023 ގެ ޗެމްޕިއަންކަން އަޝްރަފް ހަސަން، އަލީ ޚުޝްރުވާން އަޙްމަދު (ކުޑަ އައްޔަ) އަދި އާމިން އުމަރު މޫސާ ހޯދައިފިއެވެ.
މުބާރާތުގެ އެންމެ ހައިރާންކަން ގެނުވީ މެންސް އޯޕަން ކެޓަގަރީއެވެ. ފޯރިގަދަ ކުރިމަތިލުންތަކަށް ފަހު މި ބައިގެ ޗެމްޕިއަންކަން އަޝްރަފް ހަސަން ހޯދީ ރާއްޖޭގެ އެންމެ ކާމިޔާބު ބޮޑީބޯޑަރ އަލީ ހުޝްރުވާން (ކުޑަ އައްޔަ) ފަހަތަށް ޖައްސާލުމަށްފަހު އެވެ.
މެންސް އޯޕަންގެ ފައިނަލުގައި ވާދަކޮށްފައިވަނީ އަޝްރަފް ހަސަން، ކުޑަ އައްޔަ، އާމިން އަދި އަލީ ޝާމް ރާފިއުއެވެ. އަޝްރަފް އެއްވަނަ ހޯދީ ކުޑަ އައްޔައަށްވުރެ 0.66 ޕޮއިންޓު އިތުރަށް ހޯދައިގެންނެވެ. އެގޮތުން އަޝްރަފަށް ލިބުނީ 14.16 ޕޮއިންޓެވެ. ކުޑަ އައްޔައަށް ލިބުނީ 13.50 ޕޮއިންޓެވެ. މި ކާމިޔާބީއާއެކު އަޝްރަފް ވެފައިވަނީ ވޭތުވެދިޔަ 10 އަހަރުދުވަހުގެ ތެރޭ ކުޑައައްޔަ ބަލިކުރި ފުރަތަމަ އެތްލީޓަށެވެ.
މުބާރާތުގެ ޖޫނިއާ ބައިގެ ޗެމްޕިއަންކަން އާމިން ހޯދީ 10.40 ޕޮއިންޓާއެކުއެވެ. މިދިޔަ އަހަރު ދެވަނަ ހޯދި އިޔާން އަހުމަދަށް މިބުރުވެސް ލިބުނީ ދެވަނަ މަގާމެވެ. އޭނާއަށް ލިބުނީ 9.26 ޕޮއިންޓެވެ. މީގެއިތުރުން ޑްރޮޕް ނީގެ ބައިން ކުޑަ އައްޔަ ވަނީ ތަށި ދިފާއުކޮށްފައެވެ. އޭނާ ޗެމްޕިއަންކަން ހޯދީ 7.40 ޕޮއިންޓާއެކުއެވެ.
ބުރުނު ޝިކާރުގެ ކާމިޔާބީއަށްފަހު ދެން އޮތީ ފުވައްމުލަކުގައި ބާއްވާ ބޮޑީބޯޑިން ޗެލެންޖެވެ.