ޖަރުމަނުގެ ބާލިންގައި ކުރިއަށްދާ ސްޕެޝަލް އޮލިމްޕިކްސް ވޯލްޑް ގޭމްސްގައި ވާދަކުރާ ރާއްޖޭގެ ދުވުންތެރިޔާ ޒާނާ އަލީ ޝަރީފް، އެތުލެޓިކްސްގެ 200 މީޓަރު އިވެންޓުން ލޯ މެޑެލް ހޯދައިފިއެވެ.
މި މަހުގެ 17 އިން 25 ވަނަ ދުވަހުގެ ނިޔަލަށް ކުރިޔަށްދާ މި މުބާރާތުގައި ރާއްޖެއިން ވާދަކުރަނީ ދެ ކުޅިވަރެއްގައެވެ. އެއީ އެތުލެޓިކްސްގެ އިތުރުން ބެޑްމިންޓަނެވެ. ބެޑްމިންޓަންގައި ޖުމްލަ ދެ އެތުލީޓުން ވާދަކުރާއިރު، އެ ދެ އެތުލީޓުންވެސް ވާދަކުރާނީ ސިންގަލްސް އިވެންޓުގައެވެ. އަދި އެތުލެޓިކްސްގައި ރާއްޖެއިން ވާދަކުރާނީ 100 މީޓަރާއި 200 މީޓަރު ދުވުމުގެ އިތުރުން ސްޓޭންޑިން ޖަމްޕް އިވެންޓުގައެވެ.
މި ގޭމްސްގެ 200 މީޓަރު ދުވުމުގައި ރާއްޖޭގެ އައިޝަތު ލައިކާ ވަނީ ފަސްވަނަ ހޯދާފައެވެ. އަދި ރާއްޖޭގެ ސުޖޫދު ވަނީ ސްޓޭޑިން ޖަމްޕުގެ ފައިނަލް ބުރަށް ދަތުރުކޮށްފައެވެ. ރާއްޖެއިން މި ގޭމްސްގައި ވާދަކުރާ ހުރިހާ އެތްލީޓުންވެސް ދަނީ ކޮންމެ އިވެންޓެއްގައި ވެސް ރަނގަޅު ވާދައެއް ކުރަމުންނެވެ. މީގެއިތުރުން ބެޑްމިންޓަންގައި ރާއްޖޭގެ އައިޝަތު މާނިޔާ އާދަމް ވަނީ އުރުދޫން އަށް ނިސްބަތްވާ އާއިޝަތު އަލް އަވާދު ބަލިކޮށްފައެވެ.
މިއީ ރާއްޖެއިން މި ގޭމްސްގައި ވާދަކުރާ ދެވަނަ ފަހަރެވެ. މީގެކުރިން 2019 ވަނަ އަހަރު އަބޫ ދާބީގައި ބޭއްވި ވޯލްޑް ގޭމްސްގައި ރާއްޖެއިން ވާދަކުރީ ހަމައެކަނި އެތުލެޓިކްސްގައެވެ. އެ ފަހަރު ނިއު ނޭޝަންސް ކެޓަގަރީގެ އަންހެނުންގެ 100 މީޓަރު ދުވުމުން ރާއްޖޭގެ ޝިފްނާ އިބްރާހީމް ވަނީ ރަން މެޑެލް ހޯދާފައެވެ. އަދި ފިރިހެނުންގެ 200 މީޓަރު ދުވުމުގައި ވާދަކޮށް ރާއްޖޭގެ ވަސްމީ ވަހީދު ވަނީ ރިހި މެޑެލް ހޯދާފައެވެ.
މި އަހަރުގެ ގޭމްސްގައި 190 ގައުމަކުން ހަތްހާސް ފައްސަތޭކައެއްހާ އެތުލީޓުން ވާދަކުރާނެއެވެ.