ދުނިޔޭގައި އުފެދުނު އެންމެ މޮޅު ކުޅުންތެރިންގެ ތެރޭގައި ހިމެނޭ ޕޯޗުގަލުގެ ފޯވާޑް ކްރިސްޓިއާނޯ ރޮނާލްޑޯ، ޤައުމީ ޓީމަށް ކުޅެދިން ތާރީޚީ 200 ވަނަ މެޗުގައި ލަނޑު ޖަހައިފިއެވެ.
ޔޫރޯ 2024 ކޮލިފައިންގ ގްރޫޕް ޖޭގައި ޕޯޗުގަލް އާއި އައިސްލަންޑް ބައްދަލުކުރިމެޗް އެއްލަނޑު ސުންލަނޑުން ކާމިޔާބުކޮށްފައިވަނީ ޕޯޗުގަލްއެވެ.
އައިސްލަންޑްގައި ކުޅުނު މިމެޗް ފެށުމުގެ ކުރިން ޤައުމީ ޓީމަށް 200 މެޗް ކުޅެދިން ފިރިހެން ފުރަތަމަ ކުޅުންތެރިޔާއަށް ވެގެންދިއުމުގެ ރިކޯޑް ފާހަގަ ކުރުމުގެ ގޮތުން މެޗް ފެށުމުގެ ކުރިން އޭނާއަށް ވަނީ ގިނިސް ވާރލްޑް ރިކޯޑްސްގެ ފަރާތުން ސަރޓިފިކޭޓް ހަވާލުކުރުން ބާއްވާފައެވެ.
ވަރަށް ވާދަވެރި ކުޅުމެއް ދެޓީމްގެ ފަރާތުން ފެނިގެންދިޔަ މިމެޗްގައި ގިނައިރު ބޯޅަ ގެންގުޅެ ގިނަ ހަމަލާ އުފައްދާފައިވަނީ ޕޯޗުގަލްއިންނެވެ. ނަމަވެސް އެއާއެކުވެސް އައިސްލަންޑްގެ ޑިފެންސް ފޫއަޅުވާލުން ވެގެންދިޔައި ޕޯޗުގަލްގެ ކުޅުންތެރިންނަށް އުނދަގޫ ކަމަކަށެވެ. އަދި މިއާއެކު މިމެޗް އެއްވަރު ވެގެން ނިމެން ދަނިކޮށް މިމެޗުން ޕޯޗުގަލް މޮޅުވި ލަނޑު މެޗް ނިމެން އެއް މިނެޓަށް ވެފައިވަނިކޮށް ޖަހާދިނީ ރޮނާލްޑޯއެވެ.
މި ލަނޑު ޖެހުމުގައި އެހީތެރިވެދިން ގޮންކާލޯ އިނާސިއޯ އޮފް ސައިޑް ކަމަށް އެންމެ ފުރަތަަމަ ދެއްކި ނަމަވެސް ވީއޭއާރުން ބެލުމަށްފަހު ރޮނާލްޑޯގެ ތާރީހީ މެޗްގައި ކާމިޔާބުކުރި މިލަނޑު ވަނީ ލަނޑެއް ކަމަށް ނިންމާ އޭނާގެ މިމެޗްއިތުރަށް ފުރިހަމަ ކުރުމަށް މަގުފަހިވެގެން ގޮސްފައެވެ. މިއީ އޭނާ ޤައުމީ ޓީމަށް ޖަހާދިން 123 ވަނަ ލަނޑެވެ. މިއީ އޭނާ މިހާރުވެސް ދަމަހައްޓަމުން އަންނަ ރިކޯޑަށް އިތުރު ވެގެންދިޔަ އިތުރު ލަނޑެކެވެ.
މި ކާމިޔާބީއާއެކު ޕޯޗުގަލް މިވަނީ މިފަހަރުގެ ޔޫރޯ ކޮލިފައިންގގައި ގްރޫޕް ޖޭގައި ކުޅުނު ހަތަރު މެޗްވެސް ކާމިޔާބުކޮށް ގްރޫޕްގެ އެއްވަނައިގާ ދެ ޕޮއިންޓްގެ ލީޑެއް ނަގާފައެވެ. އަދި އައިސްލަންޑް އުޅެނީ ހަތަރު މެޗުން ލިބިފައިވާ ތިން ޕޮއިންޓާއެކު ފަސް ވަނައިގައެވެ. މިގްރޫޕްގެ ދެވަނައިގާ އުޅޭ ސްލޮވާކިއާ އާއި ލިކްޓަންސްޓައިން ބައްދަލުކުރިމެޗް އެއްލަނޑު ސުންލަނޑުން ކާމިޔާބުކުރީ ސްލޮވާކިއާއެވެ.