ޖަރުމަން ލީގުގެ އާރްބީ ލައިޕްޒީގަށް ކުޅެމުން އައި ކްރިސްޓޮފާ އެންކުންކޫ، އިނގިރޭސި ޕްރިމިއަރ ލީގުގެ ޗެލްސީއަށް ސޮއިކޮށްފިއެވެ.
މައުލޫމާތު ލިބިފައިވާ ގޮތުގައި އެންކުންކޫ ޗެލްސީއަށް ސޮއިކޮށްފައިވަނީ 52 މިލިއަން ޕައުންްޑްގެ އަގަކަށެވެ. ފަރަންސޭސިވިލާތަށް ނިސްބަތްވާ އުމުރުން 25 އަހަރުގެ މިކުޅުންތެރިޔާ އަކީ ޗެލްސީގެ އާ ކޯޗް މައުރީސިއޯ ޕޮޗެޓީނޯ އެޓީމަށް ސޮއިކުރުވި ފުރަތަމަ ކުޅުންތެރިޔާއެވެ.
އެންކުންކޫވަނީ މިދިޔަ ސީޒަންގައި ލިޕްޒިގަށް 25 މެޗް ކުޅެދީ 16 ލަނޑު ޖަހާދީފައެވެ. އަދި މިމަހު ކުޅުނު ޖަރމަން ކަޕް ލިޕްޒިގް ކާމިޔާބުކުރިއިރު އެންކުންކޫވަނީ ފައިނަލް މެޗްގައި ލަނޑުވެސް ޖަހާދީފައެވެ. އެންކުންކޫ ލިޕްޒިގަށް ބަދަލުވެފައިވަނީ 2019 ވަނަ އަހަރު ފްރެންޗް ލީގުގެ ޕެރިސް ސެއިންޓް ޖަރމެއިން އިންނެވެ. އަދި 2020-2021 ވަނަ ސީޒަންގައި ބުންޑަސްލީގާގެ އެންމެ މޮޅު ކުޅުންތެރިޔާގެ އިތުރުން ޖަރުމަން ޕީއެފްއޭގެ އެންމެ މޮޅު ކުޅުންތެރިޔާގެ މަގާމް ހޯދާފައިވެއެވެ. އޭނާ އެ ސީޒަންގައިވަނީ 20 ލަނޑު ޖަހާދީ 15 އެސިސްޓް ކޮށްފައެވެ.
ފަރަންސޭސި ޤައުމީ ޓީމަށް މިދިޔަ އަހަރު ކުޅެން ފެށި އެންކުންކޫ މިހާތަނަށް ވަނީ 10 މެޗް ޤައުމީ ޓީމަށް ކުޅެދީފައެވެ. ނަމަވެސް އަނިޔާގެ ސަބަބުން މިދިޔަ އަހަރު ފަހު ކޮޅު ބޭއްވި ފީފާ ވާރލްޑް ކަޕްގައި ކުޅެވޭގޮތެއްނުވިއެވެ.
އެންކުންކޫ ހާމަކުރިގޮތުގައި އޭނާ ޗެލްސީއަށް އާދެވުމުން ވަރަށް އުފާކުރާ ކަމަށެވެ. އަދި އޭނާ ގެނައުމަށް ޗެލްސީ ވަރަށް ބޮޑަށް މަސައްކަތް ކޮށްފައިވާކަމަށާއި މިއާ ގޮންޖެހުމާއި ކުރިމަތިލާންވެސް އޭނާ ހުރީ ފުރިހަމައަށް ތައްޔާރަށް ކަމަށެވެ. އަދި ޗެލްސީގެ ޖަރޒީ ލުމަކީ އޭނާއަށް ލިބިގެންދާނެ ފަހުރެއްގެ ގޮތުގައި އޭނާ ސިފަކުރިއެވެ.