ބްރެޒިލާ ދެކޮޅަށް ކުޅުނު ބައިނަލްއަޤުވާމީ އެކުވެރިކަމުގެ މެޗު ސެނެގާލުން ކާމިޔާބުކޮށްފިއެވެ.
ޕޯޗުގަލްގެ ލިޒްބަންގައި ކުޅުނު މިމެޗް ސެނެގާލް ކާމިޔާބުކޮށްފައިވަނީ ހަތަރު ލަނޑު ދެލަނޑުގެ ތަފާތަކުންނެވެ.
ބްރެޒިލްއިން ގިނައިރު ބޯޅަ ގެންގުޅެ ގިނަ ހަމަލާ އުފެއްދި މިމެޗްގެ ފެށުން ރަނގަޅުވީވެސް ބްރެޒިލްގެ އެވެ. މިގޮތުން މެޗްގެ 11 ވަނަ މިނެޓްގައި ލޫކަސް ޕަކުއެޓާ ޖަހާދިން ލަނޑާއެކު މިމެޗްގެ ލީޑު ބްރެޒިލްއިން ނެގިއެވެ. ނަމަވެސް މި ލަނޑު ޖެހިތާ 11 މިނެޓްފަހުން ސެނެގާލްއިން ވަނީ ލަނޑެއް ޖަހާ މެޗްގެ ނަތީޖާ ހަމަހަމަކޮށްފައެވެ. މި ލަނޑު އެޓީމަށް ޖަހާދިީ ހަބީބް ޑިއާލޯއެވެ.
ދެވަނަ ހާފްގެ ކުޅުން ފެށިތާ ހަތްވަނަ މިނެޓްގައި މާކީނިއޯސް އަތުން ބައިކޮޅަށް ވަން ލަނޑާއެކު މިމެޗްގެ ލީޑު ސެނެގާލްއިން ނެގިއެވެ. އަދި މެޗްގެ 55 ވަނަ މިނެޓްގައި ސާޑިއޯ މާނޭ ޖަހާދިން ލަނޑުން ސެނެގާލްއިން އެޓީމްގެ ލީޑު ފުޅާކުރިއެވެ.
މިމެޗްގައި ބްރެޒިލްގެ ދެވަނަ ލަނޑު މެޗްގެ 58 ވަނަ މިނެޓްގައި ޖަހާދިނީ މާކީނިއޯސްއެވެ. އަދި މިމެޗްގައި ސެނެގާލްގެ ފަހު ލަނޑު މެޗްގެ އިތުރު ވަގުތުގައި ލިބުނު ޕެނަލްޓީ އަކުން ޖަހާދިނީ ތިންވަނަ ލަނޑުވެސް ޖަހާދިން މާނޭއެވެ.