ޔޫރޯ 2024 ކޮލިފައިން ގްރޫޕް އޭގައި ސައިޕްރަސްއާ ދެކޮޅަށް ކުޅުނު މެޗު ނޯވޭއިން ކާމިޔާބުކޮށްފިއެވެ.
ނޯވޭގައި ކުޅުނު މިމެޗް އެޓީމް ކާމިޔާބުކުރީ 3 ލަނޑު އެއްލަނޑުންނެވެ.
ނޯވޭގެ ފަރާތުން މޮޅު ކުޅުމެއް ފެނިގެންދިޔަ މިމެޗްގެ ފުރަތަމަ ލަނޑު މެޗްގެ 12 ވަނަ މިނެޓްގައި ޖަހާ ލީޑް ނަގާފައިވަނީވެސް ނޯވޭއިންނެވެ. މިލަނޑު އެޓީމަށް ޖަހާދިނީ އޮލާ ސޮލްބަކެންއެވެ. މިމެޗްގައި ނޯވޭގެ ދެވަނަ ލަނޑު މެޗްގެ 56 ވަނަ މިނެޓްގައި ލިބުނު ޕެނަލްޓީއަކުން ކާމިޔާބު ކޮށްދިނީ ނޯވޭގެ ފޯވަޑް އަރލިންގ ހާލަންޑްއެވެ. އަދި އޭގެ ހަތަރު މިނެޓްފަހުން ނޯވޭގެ ތިންވަނަ ލަނޑުވެސް ޖަހާދިނީ ހާލަންޑްއެވެ. މެޗްގައި ސައިޕްރަސްއިން ޖެހި ހަމައެކަނި ލަނޑު މެޗްގެ އިތުރު ވަގުތުގައި ޖަހާދިނީ ގްރިގޮރިސް ކޮސްޓަނޯސްއެވެ.
މި ކާމިޔާބީއާއެކު ނޯވޭ މިވަނީ މިފަހަރުގެ ކޮލިފައިންގައި ފުރަތަމަ ފަހަރަށް މެޗަކުން މޮޅުވެފައެވެ. އަދި މިވަގުތު އުޅެނީ ގްރޫޕް އޭގައި ކުޅުނު ހަތަރު މެޗުން ލިބިފައިވާ ހަތަރު ޕޮއިންޓާއެކު ގްރޫޕްގެ ތިންވަނައިގައެވެ. އަދި ސައިޕްރަސް އުޅެނީ ޕޮއިންޓެއް ނުލިބި އެންމެ ފުލުގައެވެ.
މިގްރޫޕްގެ އެއްވަނައިގާ އުޅޭ ސްކޮޓްލަންޑް އާއި ޖޯޖިއާ ރޭ ބައްދަލުކުރިމެޗް 2 ލަނޑު ސުންލަނޑުން ކާމިޔާބުކުރީ ސްކޮޓްލަންޑްއެވެ. މިއާއެކު އެޓީމަށް ވަނީ ހަތަރު މެޗުން 12 ޕޮއިންޓް ލިބިގެން ގޮސްފައެވެ. މިގްރޫޕަކީ ވަރަށް ފަހުން ނޭޝަންސް ކަޕް ކާމިޔާބުކުރި ސްޕެއިންވެސް ހިމެނޭ ގްރޫޕެވެ. ނަމަވެސް މިވަގުތު ސްޕެއިން އޮތީ ދެ މެޗުން ލިބިފައިވާ 3 ޕޮއިންޓާއެކު ތާވަލްގެ ހަތަރު ވަނައިގައެވެ.