އިންޑިއާގެ ބެންގަލޫރުގައި ބާއްވާ ސާފް ޗެމްޕިއަންޝިޕް 2023 ގައި ބޫޓާން ޓީމުގެ އަމާޒަކީ ކޮންމެ މެޗެއްގައިވެސް ރަނގަޅު ވާދައެއް ކުރުން ކަމަށް އެ ޓީމުގެ ކޯޗު ޕެމާ ދޯޖީ ބުނެފިއެވެ.
ސާފް ޗެމްޕިއަންޝިޕުގެ ކުރިން އިއްޔެ ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަމުން ދޯޖީ ބުނީ ބޫޓާނުން މުބާރާތަށް ވަރަށް ރަނގަޅަށް ތައްޔާރުވެފައިވާ ކަމަށެވެ. އެގޮތުން ގިނަ ކުޅުންތެރިންގެ ބޮޑު ސްކޮޑަކާއެކު މަހެއްހާ ދުވަސް ކުރިން އަމިއްލަ ގައުމުގައި ފަރިތަކުރުންތައް ކުރިއަށް ގެންގޮސްފައިވާ ކަމަށާއި، އަދި އިންޑިއާގެ ކޮލްކަތާގައި ހަ ދުވަހުގެ ޓްރެއިނިންގް ކޭމްޕެއް ކުރިއަށް ގެންގޮސްފައިވާ ކަމަށެވެ.
ޕެމާ ބުނީ އިންޑިއާގައި ކުރިއަށް ގެންދިޔަ ޓްރެއިނިންގް ކޭމްޕުގައި ދެ މެޗު ކުޅެން ލިބުނު ކަމަށާއި، އެ މެޗުތަކާއެކު މި މުބާރާތައް ބޫޓާން ޓީމު އޮތީ ފުރިހަމައަށް ތައްޔާރުވެފައި ކަމަށެވެ.
ޕެމާ އިތުރަށް ބުނީ މި މުބާރާތުގެ ކުރިން ނޭޕާލުގައި ކުރިއަށްދިޔަ ތްރީ ނޭޝަންސް ކަޕުން ފިލާވަޅުތަކެއް ހާސިލްކުރަން ލިބުނު ކަމަށް ބުނެފައެވެ. އެ މުބާރާތުގައި ބޫޓާން ޓީމަށް ދިމާވި އެންމެ ބޮޑު މައްސަލައަކީ ޑިފެންސްގައި އާއި އެޓޭކުގައި އެންމެ ރަނގަޅަށް ނުކުޅެވުން ކަމަށާއި، އެކަމަކު އެކަންކަމަށް ހައްލު ހޯދިފައިވާ ކަމަށް ޕެމާ ބުންޏެވެ.
ސާފް ޗެމްޕިއަންޝިޕް ފުޓުބޯޅަ މުބާރާތުގައި ބޫޓާން ހިމެނެނީ، ގްރޫޕް ބީގައެވެ. މި ގްރޫޕްގައި ބޫޓާންގެ އިތުރުން ދެން ހިމެނެނީ ރާއްޖެ އާއި، ލެބުނާން އަދި ބަންގްލަދޭޝްއެވެ.