އިންޑިއާގެ ބެންގަލޫރުގައި ބާއްވާ ސާފް ޗެމްޕިއަންޝިޕް 2023 އަކީ ލުބުނާނަށް މުޅިން އައު ތަޖުރިބާއެއް ކަމަށާއި، މުބާރާތާއެކު އަންނަ އަހަރު ބާއްވާ އޭޝިއަން ކަޕުގެ ކުރިން ރަނގަޅުކުރަން ޖެހޭ ކަންކަން ދެނެގަނެވޭނެ ކަމަށް އެ ޓީމުގެ ކޯޗު އެލެގްޒަންޑަ އިލިކް ބުނެފިއެވެ.
މުބާރާތް ފެށުމުގެ ކުރިން އިއްޔެ ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަމުން ލުބުނާނުގެ ކޯޗު އިލިކް ބުނީ އިންޑިއާގެ ބުބަނޭޝްވަރުގައި ދާދި ފަހުން ނިމުނު އިންޓަކޮންޓިނެންޓަލް ކަޕްގައި ކުޅެފައި މި މުބާރާތަށް ނުކުތުން އެއީ ލިބޭ ހިތްހަމަ ޖެހުމެއް ކަމަށެވެ. އިލިކް ބުނީ ގާތް ގާތުގައި ގިނަ މެޗުތަކެއް ކުޅުމަށްފަހު އަލަށް ކުޅޭ މުބާރާތެއްގައި ރަނގަޅު ނަތީޖާއެއް ނެރުން އެއީ އުންމީދެއް ކަމަށެވެ.
އިލިކް ބުނީ މި މުބާރާތުގައި ލެބަނަން ޓީމަށް މުހިންމީ ތަޖުރިބާ ކަމަށެވެ. މެދުއިރުމަތީ ޓީމުތަކާ އަޅާބަލާއިރު، ދެކުނު އެޝިއާގެ ޓީމުތައް ތަފާތު ކަމަށާއި، މި މުބާރާތައް ލެބަނަން އިން ނުކުންނަނީ އަންނަ އަހަރުގެ އޭޝިއަން ކަޕަށް ތައްޔާރުވުމަށް ތަޖުރިބާ ހޯދަން ކަމަށް އިލިކް ބުންޏެވެ.
ސާފް ޗެމްޕިއަންޝިޕުގައި ލެބަނަން އޮތީ ގްރޫޕް ބީގައެވެ. މި ގްރޫޕްގައި ދެން ހިމެނެނީ ރާއްޖެ، ބަންގްލަދޭޝް އަދި ބޫޓާންއެވެ. ލުބުނާނުން ފުރަތަމަ މެޗުގައި ނުކުންނާނީ ބަންގްލަދޭޝްއާ ދެކޮޅަށެވެ.