އިންޑިއާގެ ބެންގަލޫރުގައި ބާއްވާ ސާފް ޗެމްޕިއަންޝިޕް 2023 އަކީ ފީފާގެ ރޭންކިންއަށް ބަލައި ގޮތް ނިންމާ މުބާރާތެއް ނޫން ކަމަށާއި، ހުރިހާ ޓީމަކުންވެސް ތައްޔާރުވަމުން އަންނަނީ ވަރުގަދަ ރޫހެއްގައި ކަމަށް މުބާރާތް ބާއްވާ ޤައުމު ކަމަށްވާ އިންޑިއާގެ ކޯޗު ސްޓިމަކް ބުނެފިއެވެ.
އިއްޔެ ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަމުން ކޯޗު ސްޓިިމަކް ބުނީ ފުޓުބޯޅައަށް ގަޔާވާ ކޮންމެ މީހަކަށްވެސް މި މުބާރާތް ޝައުގުވެރިވާނެ ކަމަށެވެ. އަދި މި މުބާރާތުގެ މެޗުތައް ފެންނާނީ ވާދަވެރިކޮށް ކަމަށާއި، ގިނަ ލަނޑުތަކެއް މި ފަހަރުގެ މުބާރާތުން ފެނިގެންދާނެ ކަމަށް އުންމީދުކުރާ ކަމަށް ސްޓިމަކް ބުންޏެވެ.
އިންޑިއާއިން މި ފަހަރުގެ މުބާރާތައް ކުރިމަތިލާއިރު، އެޓީމަށް އޮތް އެންމެ ބޮޑު ހިތްހަމަޖެހުމަކީ ބުބަނޭޝްވަރުގައި ކުރިއަށްދިޔަ އިންޓަކޮންޓިނެންޓަލް ކަޕް ކާމިޔާބު ކުރުމެވެ. އެ މުބާރާތް ކާމިޔާބުކުރުމާއެކު ޓީމުގެ ރޫހު ވަރަށް ރަނގަޅުކަމަށް ސްޓިމަކް ފާހަގަކުރިއެވެ.
މިފަހަރުގެ މުބާރާތަކީ ޗެލެންޖެއް ކަމަށާއި، ފުރަތަމަ ކަމަކަށް މުބާރާތައް ނުކުންނައިރު، ފީފާ ރޭންކިން ހަނދާން ނައްތާލާކަމަށް ސްޓިމަކް ބުންޏެވެ. ސްޓިމަކް ބުނީ ކޮންމެ ޓީމަކުންވެސް މި މުބާރާތައް ނުކުންނަނީ ކާމިޔާބު ހޯދަން ކަމަށާއި، ރޭންކިންއަކީ ގަނޑެއްގައި ލިޔެވިފައިވާ އެއްޗެއް ކަމަށެވެ.
އިންޑިއާ ހިމެނޭ ގްރޫޕް އޭގައި ހިމެނޭ ޓީމުތަކަކީ އެގައުމުގެ އިތުރުން ކުވައިތާއި، ޕާކިސްތާން އަދި ނޭޕާލެވެ.