އިންޑިއާގެ ބެންގަލޫރުގައި ބާއްވާ ސާފް ޗެމްޕިއަންޝިޕް 2023 އަށް ތައްޔާރުވުމަށް ޤައުމީ ފުޓްބޯޅަ ޓީމުން ޖަޕާނަށް ކުރި ކޭމްޕުގައި އެކުވެރިކަމުގެ މެޗެއް ނުލިބުނު ނަމަވެސް، އެންމެ ފަހުން ކުޅުނު ފަސް މެޗުގެ ނަތީޖާ އެއީ ލިބޭ ހިތްހަމަޖެހުމެއް ކަމަށް ޓީމުގެ ކޯޗު އިޓަލީގެ ފްރެންޗެސްކޯ މޮރިއޭރޯ ބުނެފިއެވެ.
މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަމުން މޮރިއޭރޯ ބުނީ ރާއްޖެއިން މި މުބާރާތަށް ތައްޔާރުވާތާ މަހެއް ވެފައިވާއިރު، 10 ދުވަހުގެ ޖަޕާން ޓްރެއިނިން ކޭމްޕާއެކު ރާއްޖެ އޮތީ މުބާރާތަށް ވަރަށް ރަނގަޅަށް ތައްޔާރުވެފައި ކަމަށެވެ.
ޖަޕާން ކޭމްޕުގައި ރާއްޖެއިން އެކުވެރިކަމުގެ މެޗެއް ކުޅުމަށް މަސައްކަތްކުރި ނަމެވެސް މޫސުން ގޯސްވުމުގެ ސަބަބުން އެ މެޗު ކުޅެވޭ ގޮތް ވަނީ ނުވެފައެވެ. އެއާއެކު މި މުބާރާތައް ރާއްޖެއިން ނުކުންނާނީ އެކުވެރިކަމުގެ މެޗެއް ނުކުޅެއެވެ.
މޮރިއޭރޯ ބުނީ އެކުވެރިކަމުގެ މެޗެއް ރާއްޖެއަށް ކުޅެން ނުލިބުނު ނަމަވެސް އެންމެ ފަހުން ރާއްޖެއިން ކުޅުނު ފަސް މެޗުގެ ނަތީޖާ އެއީ ލިބޭ ހިތްހަމަޖެހުމެއް ކަމަށެވެ.
މޮރިއޭރޯ ބުނީ ރާއްޖޭގެ ވިސްނުމަކީ މި މުބާރާތުގައި ކުޅޭ މެޗަކަށްފަހު މެޗެއް ރަނގަޅު ކުރަމުން ދިޔުން ކަމަށެވެ. އަދި މިއީ އުނދަގޫ މުބާރާތެއް ކަމަށާއި، މުބާރާތައް ނުކުންނަ ކޮންމެ ޓީމެއްގެ އަމާޒަކީ މުބާރާތް ކާމިޔާބުކުރުން ކަމަށެވެ. އެކަމަކު އެކަންވާނީ އެންމެ ޓީމަކަށްކަން މޮރިއޭރޯ ފާހަގަކުރިއެވެ.
މާދަމާ އިންޑިއާގެ ބެންގަލޫރުގައި ފަށާ ސާފް ޗެމްޕިއަންޝިޕުގައި ރާއްޖެއިން ހިމެނެނީ ގްރޫޕް ބީގައެވެ. މި ގްރޫޕްގައި ރާއްޖޭގެ އިތުރުން ހިމެނެނީ ލެބަނަން، ބަންގްލަދޭޝް އަދި ބޫޓާންއެވެ. މުބާރާތުގެ ފުރަތަމަ މެޗުގައި އަންނަ ބުރާސްފަތި ދުވަހު ރާއްޖެއިން ނުކުންނާނީ ބަންގްލަދޭޝްއާ ދެކޮޅަށެވެ.