ޔޫރޯ 2024 ކޮލިފައިން ގްރޫޕް ސީގައި ނޯތު މެސެޑޯނިއާއާ ދެކޮޅަށް ކުޅުނު މެޗު އިންގްލަންޑުން ކާމިޔާބުކޮށްފިއެވެ.
އިންގްލަންޑްގައި ކުޅުނު މިމެޗް އެޓީމް ކާމިޔާބުކުރީ ހަތް ލަނޑު ސުންލަނޑުގެ ބޮޑު ތަފާތަކުންނެވެ.
އިންގްލަންޑްގެ ފަރާތުން މޮޅު ކުޅުމެއް ފެނިގެންދިޔަ މިމެޗްގައި ބުކާޔޯ ސާކާވަނީ ހެޓްރިކެއް ހަދާފައެވެ. މިއާއެކު އޭނާ ވެފައިވަނީ 2008 ވަނަ އަހަރަށް ފަހު އިންގްލަންޑް ޓީމަށް ހެޓްރިކް ހަދާދިން އެންމެ ޒުވާން ކުޅުންތެރިޔާއަށް ވެގެން ގޮސްފައެވެ.
މިމެޗްގެ ފުރަތަމަ ލަނޑު ޖަހާ އިންގްލަންޑަށް ލީޑު ނަގާދީފައިވަނީ އެޓީމްގެ ކެޕްޓަން ހެރީ ކޭންއެެވެ. އިންގްލަްޑްގެ ދެވަނަ ލަނޑު މެޗްގެ 38 ވަނަ މިނެޓްގައި ޖަހާދިނީ ސާކާއެެވެ. އަދި ފުރަތަމަ ހާފް ނިމުމުގެ ކުރިން މާކަސް ރަޝްފަޑްވަނީ އިންގްލަންޑްގެ ލީޑު ފުޅާކޮށްދީފައެވެ. މިމެޗްގައި އިންގްލަންޑްގެ ހަތަރު ވަނަ ލަނޑާއި ފަސް ވަނަ ލަނޑު ޖަހާ ސާކާ އޭނާގެ ކެރިއަރުގެ ފުރަތަމަ ހެޓްރިކް ފުރިހަމަ ކުރީ މެޗްގެ 47 ވަނަ މިނެޓާއި 51 ވަނަ މިނެޓްގައި ކާމިޔާބުކުރި ދެލަނޑާއެކުއެވެ.
މެޗްގައި އިންގްލަންޑްގެ ހަވަނަ ލަނޑު މެޗްގެ 64 ވަނަ މިނެޓްގައި ކާމިޔާބުކޮށްދިނީ ބަދަލުކުޅުންތެރިޔާ ކެލްވިން ފިލިޕްސްއެވެ. އަދި ފަހު ލަނޑު މެޗްގެ 73 ވަނަ މިނެޓްގައި ލިބުނު ޕެނަލްޓީ އަކުން ކާމިޔާބުކޮށްދިނީ ކޭންއެވެ. މިއީ އޭނާ އިންގްލަންޑް ޓީމަށް ކާމިޔާބުކޮށްދިން 58 ވަނަ ލަނޑެވެ.
މި ކާމިޔާބީއާއެކު އިންގްލަންޑް މިވަނީ ގްރޫޕް ސީގައި މިހާތަނަށް ކުޅުނު ހަތަރު މެޗް ވެސް ކާމިޔާބުކޮށް ތާވަލްގެ އެއްވަނައިގާ ހަމަޖެހިލާފައެވެ. އަދި މިއާއެކު މިގްރޫޕުން އިންގްލަންޑް ދެން ކޮލިފައިނުވުން ވެގެންދާނީ ބޮޑު ހައިރާން ކަމަކަށެވެ.
އިންގްލަންޑުން މިހާރުވަނީ އެންމެ އުނދަގޫވާނެ ކަމަށް ބެލެވިފައިވި މެޗް ކަމުގައިވާ އިޓަލީވިލާތާއި ރަށުން ބޭރުގައި ކުޅުނު މެޗްވެސް ކާމިޔާބުކޮށްފައެވެ. އަދި ނޯތު މެސެޑޯނިއާ މިނާކާމިޔާބީއާއެކު އުޅެނީ ތިން މެޗުން ލިބިފައިވި ތިން ޕޮއިންޓާއެކު ގްރޫޕްގެ ހަތަރު ވަނައިގައެވެ. އަދި މިއީ އެޓީމް މިހާތަނަށް އެންމެ ބޮޑު ތަފާތަކުން ބަލިވި މެޗެވެ.