ދިވެހި ސާފް ލީގުގައި ހިމެނޭ "ގާމާދޫކޮޅު" މުބާރާތުގެ އޯޕަން ބައިގެ ޗެމްޕިއަންކަން ހުސައިން އަރީފް (އިބޫ) އަދި ޖޫނިއާ ބައިގެ ޗެމްޕިއަންކަން ކަޔާން އަބްދުﷲ އަރީފް ހޯދައިފިއެވެ.
ދިވެހި ސާފް ލީގުގެ މިއަހަރުގެ ތިންވަނަ އިވެންޓުގެ އޯޕަން ބައިގެ ޗެމްޕިއަންކަން އިބޫ ހޯދީ މި މަހުގެ 14 ވަނަ ދުވަހު ކ. ހިންމަފުށީގައި ފެށި ގާމާދޫކޮޅު ސާފިން މުބާރާތުގެ އޯޕަން ބައިގެ ފައިނަލުގައި ހޫދު އަހުމަދު ބަލިކޮށްގެންނެވެ.
ފައިނަލް ހީޓުގައި ވާދަކޮށް އިބޫ ވަނީ ދެ ރާޅުން 15.66ގެ ސްކޯކޮށްފައެވެ. ހޫދު އަށް ހެދުނީ 11.73 ގެ ސްކޯއެކެވެ. އިބޫ ފައިނަލަށް ދަތުރުކުރީ ސެމީ ފައިނަލުގައި އާދަމް މުއީން އިބްރާހީމްގެ މައްޗަށް ކުރި ހޯދައިގެންނެވެ. ސެމީ ފައިނަލުގައި އިބޫ 16.00ގެ ސްކޯއެއް ހޯދިއިރު، މުއީން އަށް ހޯދުނީ 11.00ގެ ސްކޯއެކެވެ.
މިދިޔަ އަހަރު ބޭއްވި ގާމާދޫކޮޅު ރާޅުގަނޑުގެ ޗެމްޕިއަންކަން ހޯދާފައިވަނީ އަހުމަދު އާގިލް (އައްމަޑޭ) އެވެ. ނަމަވެސް މިއަހަރުގެ މުބާރާތުގައި ވާދަކޮށް ފަސްވަނަ ބުރުގެ ތެރެއިން ފަޔަށް ލިބުނު އަނިޔާއަކާއި ގުޅިގެން އޭނާ މުބާރާތް ދޫކޮށްލީއެވެ.
މީގެއިތުރުން ޖޫނިއާ ބައިގެ ޗެމްޕިއަންކަން ކަޔާން އަބްދުﷲ އަރީފް ހޯދީ ފައިނަލުގައި ޔަސީން އަހުމަދު ނާޝިދުގެ މައްޗަށް 5.27ގެ ތަފާތަކުން ކުރި ހޯދައިގެންްނެވެ. ފައިނަލް ހީޓުގައި ކަޔާން 12.77ގެ ސްކޯއެއް ހޯދިއިރު، ޔަސީން އަށް ހޯދުނީ 7.50ގެ ސްކޯއެކެވެ.
ޗެމްޕިއަންކަން ހޯދި ކަޔާން ފައިނަލުން ޖާގަ ހޯދީ މި މުބާރާތުގައި ރަނގަޅު ފޯމެއްގައި ހުރި މުހައްމަދު އިނާން އަބްދުލްހަންނާން ބަލިކޮށްގެންނެވެ. ސެމީ ފައިނަލް ހީީޓުގައި ކަޔާން 11.83ގެ ސްކޯއެއް ހޯދިއިރު، އިނާން އަށް ހޯދުނީ 10.06ގެ ސްކޯއެކެވެ.
ޔަސީން ފައިނަލުން ޖާގަ ހޯދީ ސެމީ ފައިނަލުގައި ޝާނިފް ޝަފީގް ބަލިކޮށްގެންނެވެ. ޔަސީން 11.84ގެ ސްކޯއެއް ހޯދިއިރު، ޝާނިފް އަށް ސެމީގައި ހޯދުނީ 8.53ގެ ސްކޯއެކެވެ.
ގައުމީ ސާފް ލީގުގައި ހިމެނެނީ ޖުމްލަ ފަސް އިވެންޓެވެ. ބާކީ އޮތީ އަންނަ ޖުލައި މަހުގެ 28 އިން އޮގަސްޓު 5އަށް ރ.ކިނޮޅަހުގައި އޮންނަ ހުރާކޮޅު ރާޅުގަނޑު އެވެ. އަދި މި އަހަރުގެ ވެސް އެންމެ ފަހު މުބާރާތް ކަމަށްވާ ރަންނަމާރި ޗެލެންޖް މާލޭގައި އޮންނާނީ އޮކްޓޫބަރު މަހުގެ 27 އިން ނޮވެމްބަރު މަހުގެ 25 ގެ ނިޔަލަށެވެ.