އިންޑިއާގެ ބެންގަލޫރުގައި ފަށާ ސާފް ޗެމްޕިއަންޝިޕް ފުޓްބޯޅަ މުބާރާތުގައި ވާދަކުރާ ރާއްޖޭގެ ޤައުމީ ފުތްބޯޅަ ޓީމާ، ރާއްޖެއިން ސްރީ ލަންކާއަށް ކަނޑައަޅައިފައި ހުންނަވާ ސަފީރު ޢަލީ ފާއިޒް ބައްދަލުކުރައްވައި، ޓީމަށް ހިތްވަރުދެއްވައިފިއެވެ.
މިމަހުގެ 21 އިން އަންނަ ޖުލައި މަހު ހަތަރުވަނަ ދުވަހުގެ ނިޔަލަށް ކުރިޔަށްދާ މި މުބާރާތުގައި ރާއްޖޭގެ ޓީމު ބެންގަލޫރަށް ދިޔުމުގެ މަގުމަތީގައި ސްރީލަންކާގައި ޓީމު ޓްރާންސިޓް ވެގެން ތިބި ވަގުތު، 1977 ވަނަ އަހަރު ނޭޕާލުގައި އޮތް ސާފް ޗެމްޕިއަންޝިޕްގައި ގައުމީ ޓީމުގެ މެނޭޖަރުކަން ކުރެއްވި އަލީ ފާއިޒް ވަނީ ޓީމު ތިބޭ ހޮޓަލަށް ވަޑައިގެން ޓީމުގެ ކުޅުންތެރިންނާއި އޮފިޝަލުންނާ ބައްދަލު ކުރައްވައި ޙާލު ބައްލަވައި ހިތްވަރުދެއްވާފައެވެ.
ޓީމާ ބައްދަލުކުރައްވައި ގައުމީ ޓީމުގެ ކުރީގެ މެނޭޖަރު އަލީ ފާއިޒް ވަނީ އެންމެ ފަހު ވަގުތަށްވެސް އުންމީދު ދޫކޮށްނުލައި މޮޅުވާން ހިތްވަރުކުރުމަށް އެދިވަޑައިގެންފައެވެ. އަދި ކޮންމެ ކުޅުންތެރިޔަކުވެސް ގައުމު ތަމްސީލު ކުރަން އަރައި ހުންނައިރު، ގައުމަށް ރީތިނަމާއި ޝަރަފް ހޯދައިދިނުމުގެ ވަރުގަދަ އަޒުމެއްގައި ތިބުމަށް އެދިވަޑައިގެންނެވިއެވެ.
މީގެއިތުރުން ސާފް ޗެމްޕިއަންޝިޕްގައި ރާއްޖޭގެ ޓީމު މީގެކުރިން ހޯދާފައިވާ ކާމިޔާބީ ތަކުން މިސާލު ނަންގަވައި އަލީ ފާއިޒް ޓީމަށް ހިތްވަރުދެއްވިއެވެ. ޓީމުގެ ކުޅުންތެރިންނާއި އޮފިޝަލުން ވަނީ ކޮލަމްބޯގައި މަޑުކޮށްލި ވަގުތު ހޮޓަލަށް ވަޑައިގެންނެވީތީ އަލީ ފާއިޒަށް ޝުކުރު އަދާކޮށްފައެވެ. އަދި ދެއްވި ހިތްވަރާއި ބެހެއްޓެވި ގާތްކަމަށް ކުޅުންތެރިންނާއި އޮފިޝަލުން ވަނީ ޝުކުރު އަދާ ކުރައްވާފައެވެ.
ލަންކާގައި ހުންނަވާ ސަފީރު އަދި ގައުމީ ޓީމުގެ ކުރީގެ މެނޭޖަރު އަލީ ފާއިޒް ގައުމީ ޓީމާ ލަންކާއިން ބައްދަލު ކުރައްވައި ހިތްވަރު ދެއްވަން ވަޑައިގެންނެވިއިރު، ލަންކާގައި ހުންނަ ހައިކޮމިޝަނުގެ ސެކަންޑް ސެކްރެޓަރީ ކަމުގައި މިވަގުތު ހުންނެވި، ކުރީގެ މަޝްހޫރު ކުޅިވަރު ނޫސްވެރިޔާ ޖައުފަރު ރަޝީދު (ޖޯރޭ) ވެސް ވަނީ ބައިވެރިވެވަޑައިގެންފައެވެ.