ޔޫރޯ 2024 ކޮލިފައިން ގްރޫޕް އޭގައި ސްކޮޓްލަންޑުން ފަހަތުން އަރައި ނޯވޭ ބަލިކޮށްފިއެވެ.
ނޯވޭގެ އޮސްލޯގައި ކުޅުނު މިމެޗް ސްކޮޓްލަންޑުން ކާމިޔާބުކޮށްފައިވަނީ 2 ލަނޑު އެއްލަނޑުންނެވެ. ދެޓީމްގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗްގައި ގިނައިރު ބޯޅަ ގެންގުޅެ ގިނަ ހަމަލާ އުފައްދާފައިވަނީ ނޯވޭއިންނެެވެ.
މިމެޗްގެ ފުރަތަަމަ ހާފްގައި ދެޓީމުން ކުރެ އެއްވެސް ޓީމަކަށް ލަނޑެއް ކާމިޔާބު ކުރެވޭގޮތެއްނުވިއެވެ. އަދި މިމެޗްގެ ފުރަތަމަ ހާފްގައި ނޯވޭގެ ނުރައްކާތެރި ފޯވަޑް އަރލިންގ ހާލަންޑަށްވެސް މާރަނގަޅު ކުޅުމެއް ދެއްކޭގޮތެއްނުވިއެވެ. މިމެޗްގެ ދެވަނަ ހާފްގައި އެއާ ހިލާފަށް ނޯވޭއިން އެޓީމްގެ ކުޅުން ރަނގަޅުކޮށް ސްކޮޓްލަންޑްގެ ގޯލަށް ނުރައްކާކުރަން ފެށިއެވެ.
ނަތީޖާއަކަށް ވެގެންދިޔައީ މެޗްގެ 61 ވަނަ މިނެޓްގައި ނޯވޭއަށް ޕެނަލްޓީއެއް ލިބިގެންދިއުމެވެ. މި ޕެނަލްޓީ ކާމިޔާބުކޮށްދީ މެޗްގެ ލީޑު ނޯވޭއަށް ނަގާދިނީ ސީޒަންގައި ކާމިޔާބުކުރި 53 ވަނަ ލަނޑާއެކު ހާލަންޑްއެވެ. މި ނަތީޖާގައި އޮވެ މެޗް ނިމެން ތިން މިނެޓަށް ވެފައިވަނިކޮށް މުޅި މެޗް ބަދަލުވެގެންދިޔައެވެ. ނޯވޭގެ ޑިފެންސަށް ހެދުނު ގޯހެއްގެ ފައިދާ ނަގާ ސްކޮޓްލަންޑްގެ ލިންޑޮން ޑައިކްސް ވަނީ މެޗްގެ ނަތީޖާ ހަމަހަމަކޮށް އެޓީމަށް ޕޮއިންޓެއް ލިބޭނެކަން ކަށަވަރުކޮށްދީފައެވެ. އަދި މެޗްގެ ނިމެން އެންމެ މިނެޓަކަށް ވެފައިވަނިކޮށް ކެނީ މެކްލީން ކާމިޔާބުކޮށްދިން ލަނޑާއެކު މިމެޗްގެ ތިން ޕޮއިންޓްވެސް ސްކޮޓްލަންޑަށް ކަށަވަރުވެގެންދިޔައެވެ.
މި ކާމިޔާބީއާއެކު ސްކޮޓްލަންޑް މިހާރު މިވަނީ މިފަހަރުގެ ކޮލިފައިންގގައި ކުޅުނު ތިން މެޗްވެސް ކާމިޔާބުކޮށް ގްރޫޕް އެއްވަނައަށް އަރާފައެވެ. އަދި ނޯވޭ އުޅެނީ ކުޅުނު ތިން މެޗުން ލިބުނު އެއް ޕޮއިންޓާއެކު ތާވަލްގެ ހަތަރު ވަނައިގައެވެ.