އިނގިރޭސި ޕްރިމިއަރ ލީގުގެ ޓޮޓްނަމް ހޮޓްސްޕާއަށް ލޯނު އެއްބަސްވުމެއްގެ ދަށުން މިދިޔަ ސީޒަނުގައި ކުޅުނު ޑެޔާން ކުލުސޭވްސްކީ، އެ ކުލަބަށް ދާއިމީކޮށް ބަދަލުވެއްޖެއެވެ.
އިޓާލިއަން ސެރީއާގެ ޔުވެންޓަސްއަށް ނިސްބަތްވާ މިކުޅުންތެރިޔާ ސްޕަރސްއަށް ދާއިމީކޮށް ބަދަލުވެފައިވަނީ ފަސް އަހަރު ދުވަހުގެ އެއްބަސްވުމެއްގެދަށުންނެވެ.
ސްވިޑްންގެ މިކުޅުންތެރިޔާ ސްޕަރސްއަށް ބަދަލުވެފައިވަނީ 2022 ވަނަ އަހަރުގެ ޖެނުއަރީމަހު 18 މަސް ދުވަހުގެ ލޯންއެއްބަސްވުމެއްގެދަށުންނެވެ. އަދި އެއެއްބަސްވުމުގައި ސްޕަރސްއިން ބޭނުންވާނަމަ 29.2 މިލިއަން ޕައުންޑްގެ އަގަކަށް އޭނާ ދާއިމީކޮށް ގަތުމުގެ ފުރުސަތުވެސް ހުޅުވާލައިފާ ވެއެވެ.
މައުލޫމާތު ލިބިފައިވާގޮތުގައި ޔުވެންޓަސްއިން ވަނީ މި އަގު ފަހުން 25 މިލިއަން ޕައުންޑަށް ކުޑަކޮށްފައެވެ. އުމުރުން 23 އަހަރުގެ މި ކުޅުންތެރިޔާ ސްޕަރސްއަށް މިހާތަނަށް ކުޅުނު 57 މެޗްގައި އޭނާވަނީ 7 ލަނޑު ޖަހާދީފައެވެ. ކުލުސޭވްސްކީ ޔުވެންޓަސްއަށް ސޮއިކޮށްފައިވަނީ 2020 ވަނަ އަހަރުއެވެ. އަދި ކުޅުނު ފުރަތަމަ މެޗްގައިވަނީ ލަނޑު ޖަހާފައެވެ. އަދި އެޓީމަށް ކުޅުނު 74 މެޗްގައި 9 ލަނޑު ޖަހާދީފައިވެއެވެ.
ކުލުސޭވްސްކީވަނީ ސްވިޑްން ޤައުމީ ޓީމަށް މިހާތަނަށް 29 މެޗް ކުޅެދީ ދެ ލަނޑު ޖަހާދީފައެވެ